Bugungi kunda mamlakatimizda mingdan ortiq mahalla fuqarolar yig`ini turli tashkilotlar yoki tadbirkorlarga tegishli binolarda joylashgan. Yana mingdan ziyodi ijtimoiy muassasalarda, hatto qo`shni mahalla yig`inlari binolarida ham faoliyat ko`rsatmoqda. Prezident Shavkat Mirziyoev shu yilning 12 fevral kuni mahalla tizimini takomillashtirish masalalari bo`yicha o`tkazgan videoselektor yig`ilishida mahalla idoralarining moddiy-texnik bazasini mustahkamlash masalalariga ham e`tibor qaratishni tayinlagan edi. Aynan shu topshiriq natijasi o`laroq manzili omonat bo`lgan MFYlar soni yana 2 taga qisqardi.
“To`yga to`yona”
Qo`shimcha mahalliy byudjet mablag`larini yo`llar, yangi istirohat bog`i, zamonaviy shifoxona va shu kabi ijtimoiy soha ob`ektlariga maqsadli yo`naltirib, aholi uchun yaxshi sharoit yaratishda kamarbasta bo`lib kelayotgan Surxondaryo viloyati Qumqo`rg`on tumani hokimi Rahmatulla Gapparovning yana bir tashabbusi bilan eng ulug`, eng aziz bayramga tuhfa sifatida fuqarolar yig`ini idoralari bo`lmagan mahallalarga hokimlikning qo`shimcha mablag`lari hisobidan mahalla binosi qurib berildi. Qisqa vaqt ichida foydalanishga topshirilgan tumanning chekka hududlaridagi “G`alaba”, “Tayfang” mahalla binolarida kutish zalidan tashqari hodimlar, fuqarolar va hatto hududdan saylangan deputat uchun ham alohida xonalar ajratilgan.
Buni boshidan o`tkazgan biladi
— Men 40 yilga yaqin shu mahallada istiqomat qilib kelaman, - deydi 84 yoshli otaxon Mamazoir Jo`lliev. - Mahalla binosi yo`qligi tufayli bir xonada ijarada turardi, bu esa xodimlar uchun ham, fuqarolar yig`iniga kelgan shu erlik aholi uchun ham turli noqulayliklar tug`dirardi. Davlatimiz mustaqilligining 29 yilligi bayramiga mahalla ahli uchun mazkur binoning foydalanishga topshirilishi yaxshigina bayram tuxfasi bo`ldi. Tashabbuskorlarga o`z minnatdorchiligimizni bildiramiz.
Nigora Jumaeva, Sardorbek Rahmonqulov
