Sal avval Qo`ng`irot tumani Favqulodda vaziyatlar bo`limi boshlig`i podpolkovnik Akimov Kuanishbay Mirzabaevich hamda Qo`shko`pir tumani Favqulodda vaziyatlar bo`limi boshlig`i mayor Jabbarov Doniyor Raximovichlarning koronavirusdan vafot etgani aytilgan edi.
Ayni paytda SSV ulardan birining koronaivrusdan vafot etganini rad etdi.
"Qo`shko`pir tumani favqulodda vaziyatlar bo`limi boshlig`i mayor D.J. 12 sentyabr kuni koronavirus asoratlari tufayli vafot etgani o`z isbotini topmadi.
Koronavirusdan gumon qilinib shifoxonaga yotqizilgan marhum bemordan 10 sentyabr kuni olingan maxsus laboratoriya natijalariga ko`ra, unda koronavirusni keltirib chiqaruvchi “SARS CoV-2” virusi aniqlanmagan.
Shuningdek, ijtimoiy tarmoqlarda koronavirusdan vafot etgani aytilgan xivalik shifokor B.Q.ning Urganch shahar tibbiyot birlashmasiga qarashli karantin shifoxonasidan olingan kasallik tarixi ma`lumotlariga ko`ra, marhumda koronavirus infeksiyasi tasdiqlanmagan.
27 avgust kasalxonaga yotqizilgan bemorda birlamchi tekshiruv jarayonida maxsus laboratoriya tekshiruvida ham, keyingi tashxislarda ham koronavirus infeksiyasi aniqlanmagan. Bemorning o`limdan keyingi tashxisi natijalariga ko`ra, bemorning vafotiga ikki tomonlama pnevmoniya sabab bo`lganini ko`rish mumkin", deyiladi Xorazm viloyat sog`liqni saqlash boshqarmasi ma`lumotlari asosida taqdim etilgan SSV xabarida.
