"Parkent tumani hokimligi zaxira byudjetdan 269 mln so`m ajratib, 260 mln so`mga "Kaptiva" rusumli avtomobil xarid qilgan". Bugun ijtimoiy tarmoqlar va mahalliy internet-nashrlarda ushbu xabar keng tarqaldi.
Toshkent viloyati hokimligi axborot xizmati rahbari Behzod Qobulov mazkur holat yuzasidan izoh berdi:
"Haqiqatan ham, tuman hokimligi "Kaptiva" rusumli avtomashina uchun shu kunlarda mablag` o`tkazgan. Vositachi korxona ta`sischilaridan biri tuman hokimining o`g`li ekanligi ham to`g`ri. Ammo o`rganishlarimiz natijasida qo`shimcha tafsilotlar yuzaga chiqqach, vaziyat haqida jamoatchilikka axborot berishga jazm etayapman.
O`zingizga yaxshi ma`lumki, Parkent – tog` va tog`oldi hududlardan tarkib topgan. Shundan kelib chiqib, 2019 yilda tuman hokimligi "Kaptiva" yo`ltanlamas mashinasini xarid qilishni rejalashtirgan. Biroq o`sha vaqtda tuman byudjetida etarli mablag` bo`lmagani tufayli, tuman hokimining farzandi, ya`ni "MEGA KARER" MChJ ta`sischilaridan biri otasi foydalanishi uchun mazkur mashinani berib turgan.
Og`zaki kelishuvga ko`ra, tuman byudjetida etarli mablag` bo`lgan paytda pul o`tkazib beriladigan bo`lgan. Ya`ni mashina tuman hokimligi ixtiyoriga berilgan paytda yangi bo`lgan. Oradan bir yildan ko`proq vaqt o`tgach, to`lov qobiliyati shakllanganidan keyin bu mablag`lar firmaga baholovchi tashkilot tomonidan belgilangan narxga ko`ra o`tkazib berilgan.
Yanayam aniqroq aytganda, tuman hokimining farzandi tuman hokimligiga yangi "Kaptiva"ni keyinroq to`lab berish shartiga rozi bo`lgan holda topshirgan. Qarindosh-urug`chilik rishtasidan, bu o`rinda, manfaat ko`zda tutilmagani, qaytaga avtomashinani real narxidan past bahoga xarid qilinganiga e`tibor qaratishingizni istardim".
Qobulovning yozishicha, pandemiya davrida Parkentda mahalliy byudjetdan 1 milliard 200 million so`m mablag` koronavirusga qarshi kurashish maqsadiga yo`naltirilgan (dori-darmon zaxirasi, kerakli jihozlar uchun). Shuningdek, tuman SEOMga zarur turdagi jihozlarni xarid qilishga 200 million so`m mablag` ajratilgan. "Changi" MFYdagi qishloq oilaviy poliklinikasida koronavirus kasalligi bilan og`rigan bemorlarni qabul qilishga ixtisoslashgan 40 o`rinli zaxira joy tayyorlanib, kerakli jihozlar bilan ta`minlandi.
Jaydari qilib aytganda, byudjetning puli ko`chada qolmagan va bu borada o`ta kuchli nazorat tizimi mavjud.
Shuningdek, ma`lum bo`lishicha, tuman hokimi Nig`mat Muhamedov o`z oylik maoshidan jamg`argan puliga 10 ta sun`iy nafas olish uskunasini tuman shifoxonasiga bergan.
"... Xulosa qilib aytganda, bu vaziyatda byudjet mablag`i talon-toroj bo`lgani haqida pisandalar baquvvat asosga ega emas. Qolaversa, hozir davlat xaridlari qachon va qaerdan amalga oshirilgani internet tarmog`ida e`lon qilinayapti. Rahbarning farzandi ta`sis etgan firma orqali texnika xarid qilingani – bu xarid asossiz, o`z navbatida, moliyaviy nayrang, deb baholash uchun etarli asos bo`ladimi-yo`qmi, degan savolga har kim turlicha javob berishi mumkin.
Bu vaziyatga huquqiy baho beradigan, qonun buzilishi aniqlanganda chora ko`radigan tashkilotlar bor...", - deyiladi izoh yakunida.
