Shu kunlarda ijtimoiy tarmoqlarda Andijon viloyati hokimiga tegishli audioyozuvlar ketma-ket tarqatilayotganligi va ijtimoiy tarmoq foydalanuvchilari orasida keng muhokamalarga sabab bo`lmoqda.
Andijon viloyati hokimining har bir tarqalgan audiosi yuzasidan bildirilgan rasmiy munosabatlarda ovoz Sh. Abdurahmonovga tegishli ekani tan olinib, u «ikki yil muqaddam yozib olinganligi» ta`kidlanib kelinmoqda edi.
Ijtimoiy tarmoqlarda tarqalayotgan audioyozuvlar yuzasidan Andijon viloyati hokimligi Matbuot xizmatining yana bitta rasmiy bayonoti e`lon qilindi.
Unda ma`lum qilinishicha, bir guruh ijtimoiy tarmoq foydalanuvchilari tomonidan 2 yil muqaddam yozib olingan audioyozuvlar ijtimoiy tarmoqlardan ko`chirib olinib, g`arazli maqsadda uni ma`lum qismini kesib, «hayp» qilish niyatida ijtimoiy tarmoqlarga joylashtirilib borilmoqda.
Soha mutaxassislarini jalb qilgan holda tarqalgan audioyozuvlarni o`rganish ishlari olib borilgan. O`rganish davomida audioyozuvlar «alohida mutaxassislar» yordamida turli xil audioyozuvlardan kesib olib, montaj qilinganligi ma`lum bo`lgan.
" -- Misol uchun: «Andijon viloyati hokimining tadbirkorlarga munosabati» nomli audioda viloyat hokimining (1 daqiqa 6 soniyalik) tadbirkorlar bilan uchrashuvidagi nutqi yozib olinganligi va ijtimoiy tarmoqlarga joylanganligidan xabaringiz bor. Agar diqqat bilan eshitsangiz, ushbu audioning 59 - soniyasidan to 1 daqiqayu 6 soniyasiga qadar bo`lgan qismi boshqa audioyozuvdagi kontekst ekanligi, uni kesib olingan holda boshqa audioyozuvga ustomonlik bilan montaj qilinganligini ko`rishingiz mumkin (audioyozuvdagi tasvir va ovoz o`zgarayotganligini sezish qiyin emas). Bu esa o`z navbatida ijtimoiy tarmoq foydalanuvchilarining muhokamalariga sabab bo`lmoqda.
Shuningdek, «Andijonda rahbarlar oyoq kiyimlarni reklama qilishmoqda...mi?» sarlavhasi ostidagi fotolavhalar ijtimoiy tarmoqlarga go`yoki Andijon viloyati hokimining navbatdagi «qahramonligi» sifatida keng muhokamalarga sabab bo`ldi. Aslida ham «shu kunlarda» Andijon viloyati hokimi talabalar yotoqxonasiga borib, ular bilan uchrashganmidi? (Respublika maxsus komissiyasining qaroriga asosan Oliy ta`lim muassasalarida an`anaviy darslar 16 noyabrdan qayta tiklandi. Xohlovchilar onlayn o`qishlari mumkin).
Xabaringiz bor, 2020 yil 15 mart kunidan boshlab Respublikamiz bo`ylab kuchaytirilgan karantin choralari o`rnatildi. Shu qatorida oliy ta`lim muassasalari ham vaqtincha o`z faoliyatini to`xtatgan. Ijtimoiy tarmoqlarga joylangan rasm esa go`yoki shu kunlarda olinganligini ma`lum qilishgan. Aslida esa ushbu fotolavha viloyat hokimligi matbuot xizmati tomonidan 2019 yil 4 sentyabrda olingan.
Xulosa qilib aytganda, ijtimoiy tarmoqlarga joylab borilayotgan bu audioyozuvlar yillar davomida bir guruh shaxslar tomonidan yig`ib borilganligi, bu ishlar viloyat rahbarining imidjiga ta`sir ko`rsatish niyatida puxta o`ylangan reja asosida amalga oshirilayotganligini sezish mumkin.
Ushbu audioyozuvlarni keng ommaga tarqatish ortida shaxsga doir ma`lumotlarni qonunga xilof ravishda yig`ish, tizimlashtirish, saqlash, o`zgartirish, to`ldirish, ulardan foydalanish, ularni berish, tarqatish, uzatish, egasizlantirish va yo`q qilish uchun ko`zda tutilgan jazo choralari kuchaytirilganligini inobatga olgan holda mazkur holatlar yuzasidan huquqni muhofaza qiluvchi tashkilotlar tomonidan dastlabki surishtiruv ishlari amalga oshirilmoqda", deyiladi bayonotda.
Eslatib o`tamiz, avvalroq, Sh.Abdurahmonovning tarqalgan birinchi audiosida hokim jurnalistlarga nisbatan munosabatini bildirgan va qabuliga kelgan uch ayolni "tiqib qo`yganini" aytgan. Sal o`tib, viloyat hokimligi audio haqiqatdan ham hokimga tegishli ekanini ma`lum qilib, ayollarning "tiqib qo`yilgani" holatiga tushuntirish berilmagan edi. Undan keyin terqalgan ikkinchi audio viloyat rahbarining tadbirkorlar bilan munosabati haqida tasavvur beradi. Ya`ni Sh. Abdurahmonov kim Bosh vazirga murojaat qilsa, baribir o`ziga kelishi, mabodo, biror shikoyat Toshkent orqali kelsa, (murojaaatchining) ketiga (hokim shu so`zning qo`pol muqobilini ishlatadi) tepishini ta`kidlaydi. Uchinchi audioda hokim viloyatni rivojlantirish, obod qilish yuzasidan gapirib, bu boradagi ishlarni qo`shni Namangan va Farg`ona viloyatlaridagi holatlar bilan solishtirgan. Jumladan, Alisher Usmonov Namangandagi tumanlarni obod qilish uchun 50 million dollar ajratganini aytar ekan, "Andijonlik qaysi iflos menga bir so`m pulini berib qo`yyapti? Namanganda 50 million dollarga u nima qilyaptiyu, bir so`m puli yo`q Andijon nima qilyapti? Solishtirib ko`r. Butun respublika keldi Namanganga. Hammasi kelishib tayyor pulni eya olmayapti", — degan Andijon viloyati hokimi.
