2020 yilning 4 dekabr kuni Navbahor tumani “Sarmishsoy” tog` tizmalarida tuman IIB JQB va TEQKG tezkor xodimlari tomonidan o`tkazilgan tadbir davomida tarkibida oltin zarralari bo`lgan tosh-qumlarni qazish uchun kelgan 18 nafar shaxslar aniqlandi.
Tadbir davomida ularga tegishli bo`lgan qazish moslamalari, elektr energiyasi bilan ta`minlovchi dvijoklar, perforatorlar hamda tarkibida tilla zarrachalari bo`lgan tosh qumlar xolislar ishtirokida daliliy ashyo sifatida rasmiylashtirib olindi.
Qing`irlik rejasi asosida uzoq yo`l bosgan, egri yo`llar orqali boylik topish istagida davlat mol-mulkini talon-taroj qilgan qoidabuzarlarning ism-sharifi bundan avval ham tergov hujjatlarida aks etilgan. Ya`ni, bu ilk holat emas. Nafsiga qul bo`lish oqibatida davlat mulkiga ko`z olaytirgan, boz ustiga salomatligidan ko`ra moddiy boylikni ustun qo`ygan 18 nafar mazkur tillaga ishqibozlariga nisbatan qonuniy chora ko`rilishi ta`minlandi.
Navbahor tumani IIB JQB tezkor xodimining ta`kidlashicha, “joriy yil boshidan to bugungi kunga qadar tuman hududidagi Sarmishsoy va Jizlon tog` tizmalarida jami 47 marotaba tezkor tadbirlar uyushtirilib, bunda 140 nafar fuqarolar tarkibida oltin zarrasi mavjud bo`lgan tosh va qumlarni qazib olayotgani aniqlangan. Ushbu fuqarolarga nisbatan O`zbekiston Respublikasi Ma`muriy javobgarlik to`g`risidagi Kodeksining tegishli moddalari bilan javobgarlikka tortilgan. Ushbu holatlarda qoidabuzar fuqarolardan jami miqdorda 235 mln so`m pul mablag`lari undirilgan. Bu kabi tezkor-qidiruv tadbirlari muntazam olib borilmoqda.”
Oyni etak bilan yopib bo`lmagani kabi bugun tilla vasvasasiga tushgan guruhning qilmishi ham garchi kimsasiz cho`lu-biyobonlarda sodir etilsa-da, oshkor bo`ldi. Ta`kidlash joiz, o`z iqtisodiy etishmovchiligini ro`kach qilib, davlat mol-mulkini talon-taroj qilish hech bir qoidabuzarni jazodan ozod bo`lishiga asos bo`lmaydi. Zero, qonun barcha uchun barobar.
Shiringul ASOEVA, Navoiydan maxsus tayyorlandi