Ayrim odamlar kuppa-kunduz kuni hammaning ko`zi oldida o`z jinsdoshiga pichoq o`qtalishi odat tusiga kirdimi, bilmaysiz. "Tavba" demasdan iloj yo`q...
Shunday voqealardan biri Toshkent shahrida 2020 yilning 8 dekabr kuni soat 13:40 da sodir bo`ldi. Xususan 21 yoshli Saidahmad X. 27 yoshli Rustam M. bilan janjallashib, qo`lidagi sovuq qurol – “pakki” pichog`i bilan fuqaro Rustam M.,ning bel va o`ng lunj sohasiga tan jarohati etkazdi.
Bu xatti-harakati bilan u jamiyatda yurish-turish qoidalarini qasddan mensimasdan, jamoat joyida fuqarolar tinchini buzgani etmaganday, o`z tanishining hayotiga tajovuz qildi. Video:
Mazkur voqea Shayxontohur tumani Taxtapul mahallasi Kichik xalqa yo`li ko`chasida joylashgan «Malika savdo majmuasi»ning asosiy kirish darvozasi oldida yuz berdi.
Sud-tibbiy ekspertiza xulosasiga ko`ra, Rustam M.,ning tanasida “bel sohasi chap yarmi sanchib kesilgan jarohati. O`ng lunj sohasi kesilgan jarohat”lari mavjudligi, ular og`irlik darajasi bo`yicha “o`rtacha og`ir” tan jarohatlari hisoblanishi ko`rsatilgan.
Mazkur holat yuzasidan Shayxontohur tumani bo`yicha IIO FMB huzuridagi Tergov bo`limi tomonidan O`zbekiston Respublikasi Jinoyat kodeksining 277-moddasi 2-qismi “v” bandi (bezorilik) bilan jinoyat ishi qo`zg`atilgan. Hozirda tergov harakatlari olib borilmoqda.
