Toshkent shahar Ichki ishlar bosh boshqarmasi boshlig`i o`rinbosari - Kadrlar boshqarmasi boshlig`i polkovnik Aliaxmad Choriev, Toshkent shahar IIBB Yo`l harakati xavfsizligi boshqarmasi boshlig`ining birinchi o`rinbosari podpolkovnik Qudrat Yuldashev va xizmat vakillari halok bo`lgan katta serjant Salim Umarovning oilasiga tashrif buyurishdi. Bu haqda Toshkent shahar IIBB Matbuot xizmati xabar berdi.
Xodimlar joriy yilning kuz oyida o`zining xizmat vazifasini ado etish chog`ida halok bo`lgan YHXB xodimining oila a`zolari va yaqinlari bilan uchrashishdi. IIBB vakillari Salim Umarovning onasi Maxluba Umarov va turmush o`rtog`i Navruzaga jamiyatda amalga oshirilayotgan islohotlarga Salimning qo`shgan hissasi uchun minnatdorchilik bildirishdi, shuningdek og`ir judolikdan ruhan tushkunlikka tushmasliklarini tilashdi. Ayollarga O`zbekiston Respublikasi Prezidentining Farmoniga asosan Salim Umarovga vafot etganidan so`ng berilgan "Jasorat" medalini topshirishdi.
Eslatib o`tamiz, 1 sentyabr kuni taxminan soat 19.00 da 2-batalon YPX inspektori katta serjant Salim Umarov Mirobod tumani Shahrisabz ko`chasida xizmat vaqtida YTHga uchragan. U “Grand Mir” mehmonxonasi yaqinida tekshiruv maqsadida 25 yoshli Jahongir B. boshqaruvidagi “Captiva” (davlat raqami 01 Q 772 VV) rusumli avtomobilni to`xtatgan va haydovchidan hujjat so`ragan.
Katta serjant tekshiruvdan so`ng hujjatlarni haydovchiga qaytarib, transport vositasini aylanib o`tib, yo`l cheti tomon yurgan vaqtda “Lacetti” (davlat raqami 01 T 789 NV) rusumli avtomobilini ishonchnoma asosida boshqarib borayotgan 19 yoshli Temurbek M. Mirobod ko`chasidan chiqib, boshqaruvni yo`qotgan va yo`l chetida to`xtab turgan “Captiva” avtomobiliga to`qnashgach, inersiya tufayli harakatni davom ettirib, YPX xodimini urib yuborgan.
4 sentyabr kuni soat 7.00 da Toshkent shahar IIBB YHXB yo`l-patrul xizmati brigadasi 2 bataloni 3-mobil guruhi inspektori katta serjant Umarov Salim Usmonali o`g`li YTH oqibatida olgan jarohatlari tufayli uch kun davom etgan hayot uchun kurashdan so`ng hayotdan ko`z yumgan. Katta serjantning ortida uch nafar voyaga etmagan farzandi qolgan edi.
Mavzuga doir:
Samarqandda xizmat o`tayotgan IIB inspektorini "Damas" urib ketib, halok qildi
