Qoidabuzarlarga qonuniy va qat`iy choralar ko`riladi – IIV aholini ogohlantirdi

Avvalroq, Toshkent shahrida bosh vazir Abdulla Aripov boshchiligida koronavirusga qarshi kurash komissiyasining kengaytirilgan yig`ilishida 18 apreldan karantin qoidalariga amal qilinishini nazorat qilish yanada kuchaytirilishi haqida xabar bergan edik. 

Shu munosabati bilan Ichki ishlar vazirligi aholiga murojaat bilan chiqdi. 

“Biz xotirjamlikka berilib, o`z sog`ligimiz haqida o`ylash naqadar muhimligi haqida o`ylamay qo`ydik. Kasallanish holatlarining oshishi, birinchi navbatda oddiy ehtiyot choralariga rioya etmaslik, ya`ni tibbiy niqobdan foydalanmaslik, ijtimoiy masofani saqlamaslik oqibatida yuz bermoqda. Shu munosabat bilan respublika maxsus komissiyasining qaroriga ko`ra, Respublikamizda joriy yilning 18 aprel kunidan boshlab karantin qoidalari kuchaytiriladi. Ya`ni, jamoat joylarida niqob taqish, ijtimoiy masofa saqlash, shaxsiy gigiena qoidalariga rioya etish, qo`llarni antiseptiklar bilan zararsizlantirish tadbirlarining nazorati kuchaytiriladi va qoidabuzarlarga nisbatan qat`iy javobgarlik choralari ko`riladi.

Jamoat transportlari 50 foiz sig`imida yo`lovchilar tashiydi va ushbu maqsadda transport vositalari soni oshiriladi. To`y va boshqa marosimlarda 100 kishidan ortiq bo`lmaslik belgilanadi. Umumiy ovqatlanish shoxobchalarida o`rinlar 50 foizgacha cheklanadi. Iftorlik marosimlarini oila a`zolari davrasida o`tkazish tavsiya qilinadi.

Barcha davlat organlari va tashkilotlar yig`ilish va majlislar o`tkazishni keskin qisqartiradi hamda asosiy ishga ta`sir etmagan holda mehnat faoliyatini maksimal darajada masofadan turib tashkil etish choralarini ko`radi. Anjumanlar va boshqa tadbirlar imkoniyatga ko`ra, asosan onlayn rejimda, masofaviy tarzda o`tkaziladi.

Bog`cha va maktablarda kasallanish holatlari aniqlangan taqdirda ularning faoliyati to`xtatiladi hamda 2 haftaga karantinga olinib, onlayn darsga o`tiladi. Uy sharoitida davolanayotgan bemorlarning xonadonlarida karantin qoidalariga rioya qilish ustidan qat`iy nazorat o`rnatiladi.

Hurmatli fuqarolar, shu kungacha ichki ishlar organlari xodimlari karantin qoidalarini buzgan fuqarolarga nisbatan asosan ogohlantirish bilan cheklanayotgan edilar. Bundan buyon qoidabuzarlarga qonuniy va qat`iy choralar ko`riladi”, deyiladi vazirlik bayonotida.