Qashqadaryo viloyatining Chiroqchi tumanida qaynatasi bilan tortishib qolgan kelin o`zi va ikki nafar farzandini poezd tagiga tashlab, vafot etgan. Bu haqda «Daryo» xabar berdi. Ta`kidlanishicha, voqea kecha, 14 iyul kuni tong payti soat 05:00 da sodir bo`lgan.
Ma`lum qilinishicha, bu oila Chiroqchi tumanida yashaydi. Marhumaning eri Rossiyada ishlaydi. Kelin qaynatasi bilan janjallashib qolib, o`zi va ikki farzandini poezd tagiga tashlagan. Marhumaning eri bugun (15 iyul sanasi nazarda tutilmoqda) uyiga qaytayotgani aytilmoqda.
Chiroqchi tuman IIB boshlig`i Aktam Beshimqulov ushbu mudhish voqeani tasdiqlagan.
«Voqea kecha emas, besh-olti kun ilgari sodir bo`lgan. Haqiqatan ham ayol o`zi va ikki nafar farzandini poezd tagiga tashlab vafot etgan. Voqeaga oilaviy mojaro sabab bo`lgan. Voqea sababi va tafsilotlarini mas`ul tashkilotlar o`rganmoqda», — deydi Aktam Beshimqulov.