SSV: SERGELIDAGI YoNG`INDAN JABRLANGANLARGA BELGILANGAN STANDARTLAR BO`YIChA TIBBIY YoRDAM KO`RSATILMOQDA
Avvalroq bugun, 29 noyabr kuni soat 05:05da Toshkent shahri, Sergeli tumani, Nilufar 3-tor ko`chasida “Uzmill” MChJ hududida joylashgan ishchilar yotoqxonasida yong`in sodir bo`lgani haqida xabar bergan edik.
Dastlabki ma`lumotlarga ko`ra, ushbu yong`inga gaz quvurlarining nosozligi tufayli xonaga gaz to`planishi va buning oqibatida havo-gaz aralashmasining chaqnashi sabab bo`lgan.
O`zbekiston Respublikasi Sog`liqni saqlash vazirligi ushbu noxush hodisa tufayli jabrlanganlarning salomatligini jiddiy nazoratga oldi.
Xususan, yong`in natijasida turli darajadagi kuyish tan jarohatlarini olgan 18 nafar fuqaro darhol Respublika shoshilinch tibbiy yordam ilmiy markaziga joylashtirildi. Ayni paytda barcha bemorlarga belgilangan standartlar bo`yicha zarur tibbiy yordam ko`rsatilib, muolaja jarayonlari davom etmoqda.
So`nggi ma`lumotlarga ko`ra, yong`indan jabrlangan shaxslarning barchasi erkak kishi bo`lib, ularning 10 nafari reanimasiya bo`limida davo mulojalarini olmoqda.
