"Halqchil yondashuv"ning navbatdagi mehmoni endovaskulyar jarroh Xurshid Hakimov bo`ldi. Shifokor yosh bo`lishiga qaramay, qisqa muddatda erishgan muvaffaqiyatlari haqida gapirdi.
"Avval Moskvada, keyin Egorevsk shahrida yurak-qon tomir jarrohligi bo`yicha o`qidim, ishladim. Yosh mutaxassis bo`lsam-da, 200 dan ortiq operasiya qildim, 500 dan ortiq yuqori texnologik dianostika amaliyotini bajardim.
2021 yil yanvarda ustozimning taklifi bilan O`zbekistonga qaytdim. Hozir Sirdaryo viloyati Kardiologiya markazida o`z ixtisosligim, ya`ni intervension kardiologiya bo`yicha ishlayapman, bu viloyat uchun yangi yo`nalish hisoblanadi.
Men faoliyat yuritayotgan Endovaskulyar xirurgiya bo`limi viloyat bo`yicha yagona bo`lib, bu erda Germaniyadan keltirilgan 700 ming dollarlik zamonaviy qurilma yordamida bemorlarning yurak-qon tomir tizimidagi muammolariga 99 foiz aniqlikda tashxis qo`yiladi. Kasallangan, tromb hosil qilgan tomirni topib davolaymiz, stend qo`yamiz.
9 oy mobaynida 160 dan ortiq stendlash, 450 dan ziyod yuqori texnologik diagnostika amaliyotini bajardim.
Hozir 33 yoshdaman. Muvaffaqiyatga erishishning siri faqat mehnat va ilmda deb bilaman", - deydi shifokor
