Oilaning jamiyatdagi roli va uning ma`naviyatini oshirish dolzarb masalalardan biridir. Yig`ilishda Prezident shunday dedi:
— Farzand tarbiyasi, kelgusi taqdirida ota-onaning mas`uliyatini oshirishimiz kerak. Men buni bejiz aytayotganim yo`q. Chunki hayotda shu bilan bog`liq jiddiy muammolar saqlanib qolmoqda.
Shu o`rinda og`riqli bir savol: nima uchun hali katta hayotga tayyor bo`lmagan yosh qizlarni turmushga berish holatlari kamaygani yo`q?
Afsuski, ba`zi onalar qizini imkon qadar tezroq uzatishga harakat qiladi. Farzandining ko`nglida qanday orzu-istaklari, maqsadlari borligi bilan qiziqmaydi. O`qigan, kasb-hunari bor ayollarini ishlashiga yo`l bermayotgan erkaklar ham bor.
O`z davrida jadid bobolarimiz qizlarni oilaga tayyorlash, ayollarni millat tarbiyachisiga aylantirishga eng muhim masala deb qaraganlar
Buyuk ma`rifatparvar Abdurauf Fitrat: “Farzandlarimizni yaxshi xulq egalari qilib tarbiyalashimiz uchun avvalo, millat onalari tarbiya va ilm olishlari lozim”, deb yozgan edi.
Bu da`vat bugun ham jamiyatning bosh vazifalaridan biri hisoblanadi".
