Endi bachadon bo`yni saratonida poliklinikada ham davolash mumkin

BMTning aholishunoslik sohasidagi jamg`armasi tomonidan jurnalistlar uchun press-brifing tashkil etildi. Bu haqda darakchi muxbiri Munzura Bekjonova xabar bermoqda.

Unda “Bachadon bo`yni saratonini erta aniqlash uchun OPV testini o`tkazish” qo`shma loyihasi doirasida olib borilayotgan ishlar bo`yicha ma`lumotlar taqdim etildi.

Ushbu loyiha Qoraqalpog`iston Respublikasida BMTning aholishunoslik sohasidagi jamg`armasi (YuNFPA) tomonidan Yaponiya hukumati moliyaviy ko`magida amalga oshirilmoqda.

Uchrashuvda O`zbekiston SSV ishchi guruhi monitoring natijalarini taqdim etdi, shuningdek mutaxassislar bachadon bo`yni saratonoldi kasalliklarini davolashda termoamblyasiyani joriy etish tajribasi bilan o`rtoqlashdilar.

Statistik ma`lumotlar:

• Loyiha doirasida 30-55 yoshdagi 50 000 nafar ayollar o`rtasida OPV testi o`tkazildi.
• O`tkazilgan 49140ta (98 foiz) testdan 3290tasi (6,7 foiz)da organizmda virus mavjudligi aniqlangan.
• Ijobiy chiqqan OPV testlar bo`yicha 759 nafar (23 foiz) ayolga onkologiya bo`limiga yo`llanma berilgan, jumladan, 9 nafar ayolda (1,2 foiz) jarrohlik amaliyoti o`tkazilgan, 237 nafar (31 foiz) ayol termoamblyasiya yoki radioto`lqinli koagulyasiya muolajalarini qabul qilgan.
• Loyiha doirasida 45 nafar ginekolog, 150 nafar oilaviy shifokor, 270 nafar patronaj hamshirasi va 77 nafar doya o`qitilgan.

Odam papillomasi virusini (OPV) aniqlash uchun JSST, Yaponiya hukumati, YuNFPA hamda BMTning aholishunoslik sohasidagi jamg`armasi ko`magida zarur tashxislar uskunalari, testlar hamda dastlabki bosqichdagi bemorlarni davolash uchun 2 dona radioto`lqinli qurilma sotib olindi.

Qayd etish zarurki, endilikda olis tumanlarda istiqomat qiluvchi ayollar onkologik markazlarga borishlari shart emas, ular o`z poliklinikalarida saratonoldi shikastlanishlarini davolash bo`yicha barcha xizmatlar ko`lamidan foydalanishlari mumkin.