O`tgan yili Buyuk Britaniyaning dunyoga mashhur “GSK” farmasevtika kompaniyasida bezgakka qarshi ilk vaksina yaratilib, Jahon sog`liqni saqlash tashkiloti tomonidan keng qo`llash uchun tavsiya etilgan edi.
Ammo tadqiqotlar shuni ko`rsatdiki, mazkur emlash vositasining samaradorligi taxminan 60 foizga teng va vaqt o`tishi bilan uning ta`sir kuchi sezilarli darajada kamayadi.
Shundan kelib chiqib, bu gal Oksford universiteti olimlari yangi vaksina yaratishga bel bog`ladi. Natija kutilganidek ijobiy bo`ldi. Yangi preparatga “Oxford R21/Matrix-M” deb nom berildi.
Ma`lum bo`lishicha, u bezgakning oldini olishda 77 foiz samara beradi va buster dozasi kasallik yuqishidan ikki yil davomida himoyalaydi.
Mutaxassislar yangi vaksina mazkur xavfli kasallikka qarshi kurashda juda katta natija berishiga umid qilishmoqda.
