Bu haqda AOKAda Mudofaa vazirligi rahbariyati ishtirokida o`tkazilgan matbuot anjumanida ma`lum qilindi.
Mamlakatimizda «Inson qadri uchun» degan ezgu g`oya ostida tub islohotlar amalga oshirilmoqda. Harbiy xizmat nufuzini oshirish, yoshlarni vatanparvarlik ruhida tarbiyalash, haqiqiy harbiy xizmat o`tash uchun munosib va xavfsiz shart-sharoitlarini yaratish, O`zbekiston Respublikasi Qurolli Kuchlari harbiy xizmatchilarining qonuniy manfaatlarini ta`minlashning huquqiy kafolatlarini mustahkamlash, ijtimoiy himoyasini ta`minlash masalalari bo`yicha izchil ishlar olib borilmoqda.
“Temur tuzuklari”da: “Sipohiy davlat xizmatida ekan, boqiy hayotlarini foniy dunyo naqdi uchun ayamaganliklarining o`zi ham in`omga va moddiy ta`minotga loyiqligini bildiradi”, deya ularning murakkab va sharafli vazifalari alohida ta`kidlangan. Xalqimizga xos insonparvarlik aks etgan ushbu bobomeros tuzuk bugun ham amalda namoyon bo`lmoqda.
O`zbekiston Respublikasi Prezidentining tegishli qarorlari bilan qabul qilingan tegishli dasturlari doirasida 2017-2021 yillar davomida qurilgan uylar hisobiga 7225 nafar harbiy xizmatchi, harbiy xizmatdan rezervga bo`shatilgan fuqarolar va ularning oila a`zolari zamonaviy va shinam turar joylar bilan ta`minlandilar. Shuni alohida ta`kidlash lozimki, 2017 yilgacha bo`lgan davr mobaynida Mudofaa vazirligi tizimida turar joy ta`minoti ko`rsatkichlari yiliga 450 tadan oshmagan bo`lsa, yuqorida qayd qilingan Davlat dasturlari asosida Toshkent shahri va Respublikamiz viloyatlari markazlarida qurilish amalga oshirilgan turar joylar hisobi yiliga o`rtacha 1 500 dan ortiq raqamlarni tashkil etmoqda.
Kuchli ijtimoiy himoya, o`z navbatida, ofiser va askarlarimizning fidoyilik, burchga sadoqat bilan xizmat qilish, o`zining professional tayyorgarligini oshirib borishi uchun zamin yaratmoqda. Ko`rilayotgan kompleks chora-tadbirlar natijasida Vatan himoyachilarining harbiy xizmatga bo`lgan yondashuvi tubdan o`zgardi, harbiy qismlarda mas`uliyat va intizom mustahkamlandi, barcha harbiylar qalbida o`z Vatani bilan faxrlanish va g`ururlanish hissi yanada ortdi.
Qurolli Kuchlarimizda harbiy xizmatchilarning ijtimoiy himoyasini ta`minlash masalalarini yanada kuchaytirish maqsadida 2022 yil 25 avgustda O`zbekiston Respublikasi Prezidentining “O`zbekiston Respublikasi Prezidentining ayrim qarorlariga O`zbekiston Respublikasi Qurolli Kuchlari harbiy xizmatchilari, harbiy xizmatdan rezervga (iste`foga) bo`shatilgan (chiqarilgan) fuqarolar va ularning oila a`zolarini uy-joy bilan ta`minlash tartibini takomillashtirishga qaratilgan o`zgartirishlar va qo`shimcha kiritish to`g`risida” Qarori imzolandi.
Unga muvofiq harbiy xizmatchilarni uy-joy bilan ta`minlash masalalarida quyidagi o`zgartirishlar va qo`shimchalar kiritilgan:
harbiy xizmat majburiyatlarini bajarish vaqtida orttirilgan kasallik yoki olingan jarohati tufayli harbiy xizmatni o`tashga yaroqsiz deb topilib, rezervga (iste`foga) bo`shatilgan (chiqarilgan) O`zbekiston Respublikasi Qurolli Kuchlari harbiy xizmatchilarini, shuningdek, halok bo`lgan (vafot etgan) harbiy xizmatchilarning, ularning xizmat muddatidan qat`i nazar, oila a`zolarini uy-joy bilan ta`minlash;
harbiy xizmatchilar boshqa vazirlik va idoralar tizimiga haqiqiy harbiy xizmatni o`tash uchun o`tkazilganda, ularga berilgan xizmat xonadonlarini ham tegishli vazirlik va idoralar tasarrufiga o`tkazish;
harbiy xizmatchilarga ajratiladigan uy-joy maydonining ijtimoiy normasini aniqlashda ularning oila a`zolari bilan bir qatorda qaramog`iga olingan shaxslar toifasiga aniqlik kiritish;
umumiy harbiy xizmat muddati 20 (yigirma) yil bo`lgan harbiy xizmatni o`tab rezervga bo`shatilgan fuqarolarni davlat hisobidan turarjoy bilan ta`minlash, shu bilan birga ularning oliy ta`lim muassasalarida o`qish davri hamda davlat organlari va tashkilotlaridagi mehnat faoliyati yillarini haqiqiy harbiy xizmat yillari davriga qo`shib hisoblash.
O`zbekiston Respublikasi Prezidentining 2022 yil 25 avgustda qarorining mazmun-mohiyati keng ommaga etkazish hamda qaror talablarini bajarish yo`lida olib borilayotgan ishlar haqida keng jamoatchilik va ommaviy axborot vositalari xodimlariga ma`lumot berish maqsadida O`zbekiston Respublikasi Prezidenti Administrasiyasi huzuridagi Axborot va ommaviy kommunikasiyalar agentligining majlislar zalida “O`zbekiston Respublikasi Qurolli Kuchlari harbiy xizmatchilarini uy-joy bilan ta`minlash tartibi to`g`risidagi nizomga kiritilgan qo`shimcha va o`zgartirishlar haqida” mavzusida matbuot anjumani tashkil etildi.
Matbuot anjumanida mudofaa vazirining axborot siyosati masalalari bo`yicha maslahatchisi – matbuot kotibi polkovnik Otabek Yuldashev, Toshkent harbiy okrugi qo`shinlari qo`mondonining o`rinbosari – Toshkent garnizoni uy-joy komissiyasi raisi polkovnik Baxtiyor Uralboev, Mudofaa vazirligi Uy-joydan foydalanish boshqarmasi bo`lim boshlig`i kapitan Alijon Qambarov spiker sifatida mavzu yuzasidan harbiy xizmatchilarning ijtimoiy himoyasini ta`minlash masalalari borasidagi keng ko`lamli ishlar haqida tegishli ma`lumotlar berib, Respublika axborot agentliklari va ommaviy axborot vositalari vakillarining harbiy xizmatchilarni uy-joy bilan ta`minlash masalalari haqidagi savollariga to`laqonli javob berdilar.
Matbuot anjumanida Mudofaa vazirligining soha yo`nalishi bo`yicha mas`ul bosh boshqarma va boshqarma boshliqlari, harbiy xizmatchilarni uy-joy bilan ta`minlash masalalari bo`yicha mas`ul shaxslar hamda Respublika axborot agentliklari va ommaviy axborot vositalari vakillari ishtirok etdi.
