Rossiyada giyohvand moddalar kontrabandasi ayblovi bilan sudlangan amerikalik basketbolchi Brittni Grayner AQShda noqonuniy qurol etkazib berganlikda ayblanib 25 yilga ozodlikdan mahrum qilingan rossiyalik Viktor Butga almashtirildi. Bu haqda CNN’ga tayanib, Meduza xabar berdi.
Rossiya tashqi ishlar vazirligi almashinuv amalga oshirilganini tasdiqlagan. Jarayon 8 dekabr kuni Abu-Dabi aeroportida bo`lib o`tgan. "But allaqachon Rossiyaga qaytib kelgan", deyiladi xabarda.
"Grayner AQShga ketayotgan samolyotda", dedi AQSh prezidenti Jo Bayden. Amerika rahbari, AQSh vise-prezidenti va basketbolchining turmush o`rtog`i Grayner bilan telefon orqali suhbatlashgan. Ommaviy axborot vositalarining xabar berishicha, Bayden tez orada almashinuv to`g`risida nutq so`zlaydi.
CNN’ning ta`kidlashicha, yana bir amerikalik — Rossiyada josuslikda ayblanib, sudlangan Pol Uilan almashinuv kelishuvga kiritilmagan. Uning advokati so`zlariga ko`ra, amerikalik koloniyada qoladi, uning almashinuvi bo`yicha muzokaralar davom etmoqda.
Yozda Rossiya va AQSh Grayner va Uilanni Amerikada sudlangan ruslardan biriga almashtirishi mumkinligi haqida muzokara o`tkazayotgani ma`lum bo`lgandi. Almashish uchun nomzod esa, But ekani qayd etilgan.
Ma`lumot uchun, 55 yoshli Viktor But rossiyalik tadbirkor bo`lib, 2012 yilda AQShda noqonuniy qurol etkazib berganlikda ayblanib 25 yilga ozodlikdan mahrum qilingan. But aybini rad etib keladi.
31 yoshli Brittni Grayner AQSh va Rossiyada o`ynagan eng yaxshi zamonaviy basketbolchilardan biridir. U 2022 yil fevral oyida Sheremetevo aeroportida hibsga olingan. Tergov ma`lumotlariga ko`ra, u yuklari orasidan topilgan gashish sabab giyohvand moddalar kontrabandasida ayblangan. Ayol 10 yilgacha qamoq jazosiga hukm qilingan. Grayner aybini tan olgan.
52 yoshli Pol Uilan AQSh, Irlandiya, Kanada va Buyuk Britaniya fuqarosi. 2020 yil iyun oyida Moskva shahar sudi uni josuslikda aybdor deb topib, 16 yilga ozodlikdan mahrum qilgan. Uilan aybini tan olmagan.
