Sergelidagi portlash sabab Toshkentdagi er usti metro bekati engil shikastlagan, deya xabar bermoqda "Toshkent metropoliteni" DUK matbuot xizmati.
Ma`lum qilinishicha, yong`in sodir bo`lgan hududga yaqin bo`lgan metropolitenning Er usti halqa yo`lining "Quruvchilar" bekatining me`moriy qismini engil shikastlagan, ammo bu holat yo`lovchi va poezdlarning harakatiga ta`sir ko`rsatmagan.
Barcha metro bekatlarida poezdlar harakati belgilangan jadval asosida olib borilmoqda.
Eslatib o`tamiz, bugun, 28 sentyabr kuni Toshkent shahar Sergeli tumani "Quruvchilar" dahasida joylashgan bojxona omborxonasida kuchli chaqnash oqibatida yong`in sodir bo`ldi. Ayni paytga qadar berilgan ma`lumotlarga ko`ra, portlash va yong`in oqibatida jarohatlanganlar bor, qurbonlar haqida ma`lumot yo`q, hududddagi qator xonadonlar va boshqa ob`ektlar jiddiy zararlangan. Toshkent hokimi portlashdan talofat ko`rgan uylarning zarari qoplab berilishini ma`lum qildi.
Ayni paytda yong`in maydoni, jabrlanuvchilar soni aniqlanmoqda. Voqea joyiga Bosh vazir Abdulla Aripov va boshqa mas`ullar etib borgan.
