G`azodagi qurolli mojaroning joriy bosqichi boshlanganidan beri 25 mingdan ortiq tinch aholi halok bo`ldi, deya xabar beradi BMT axborot sayti tashkilotning gumanitar agentliklari ma`lumotlariga tayanib.
BMTning gumanitar masalalarni muvofiqlashtirish boshqarmasi 62 mingdan ortiq falastinlik yaralanganini ma`lum qildi. Boshqa narsalar qatorida, BMT sektor shifoxonalaridagi bemorlar taqdiridan xavotir bildirdi, chunki hozirda G`azoda atigi 14 kasalxona faoliyat ko`rsatmoqda. Uch oydan ortiq davom etgan shiddatli portlashlar tufayli tibbiy yordamga bo`lgan ehtiyoj mahalliy sog`liqni saqlash tizimining imkoniyatlaridan ancha yuqori.
Jahon sog`liqni saqlash tashkiloti matbuot kotibi Kristian Lindmaerning aytishicha, G`azodagi Al-Xayr kasalxonasi havo hujumlari ostida, Nosir klinikasi deyarli qamalda va unga kirish bloklangan.
"Hodisalar dahshatli ssenariy bo`yicha rivojlanmoqda: odamlar keyingi daqiqalar ularga nima olib kelishini bilishmaydi", dedi u.
21 yanvar kuni BMT Bosh kotibi G`azoda davom etayotgan xunrezlikni qoraladi va mojaroning butun Yaqin Sharq mintaqasiga tarqalishining oldini olish uchun barcha imkoniyatlarni ishga solishga chaqirdi. U ikki davlat – Isroil va Falastin rejasini qo`llab-quvvatlashini e`lon qilib, “Falastin xalqining davlatchilik huquqidan voz kechish mojaroning cheksiz cho`zilishiga olib keladi”, dedi.
23 yanvar kuni BMT Xavfsizlik Kengashida bir qancha davlatlar tashqi ishlar vazirlari ishtirokida Yaqin Sharq mojarosi bo`yicha yig`ilish bo`lib o`tdi. Kuzatuvchi Falastin tashqi ishlar vaziri Riyod al-Malikiyning aytishicha, G`azo Ikkinchi jahon urushidan keyingi davrda Isroil Bosh vaziri Binyamin Netanyaxuning xohishi bilan "eng shafqatsiz bombardimon kampaniyasini" boshidan kechirmoqda".
Isroilning BMTdagi elchisi Gilad Erdanning aytishicha, agar HAMAS o`t ochishni to`xtatish natijasida hokimiyatda qolsa, bu Isroilning mavjudligiga tahdid soladi. Biroq, uning qo`shimcha qilishicha, agar Xamas garovdagilar va Isroilga 7 oktabr kuni hujum uyushtirganlarni topshirsa, urush tugaydi.
2023 yil 7 oktabr kuni Xamas hujumidan so`ng Isroil G`azo sektorida keng ko`lamli harbiy operasiyani boshladi va u yirik havo hujumlari bilan birga bo`ldi. Dekabr oyi oxirida BMT G`azo sektorida urush boshlanganidan beri 1,9 millionga yaqin odam o`z uyini tashlab ketishga majbur bo`lganini ma`lum qildi.
