Davlat tashrifining ishbilarmonlik dasturi doirasida prezident Shavkat Mirziyoev Shenchjen shahrida Xitoyning etakchi "BYD" kompaniyasi bosh qarorgohi va texnologiyalar markaziga tashrif buyurdi.
Tashrif chog`ida kompaniya yutuqlariga bag`ishlangan ko`rgazma, avtomobillar va boshqa turdagi texnikalarning ishlab chiqarilayotgan va istiqbolli modellari, kompaniyaning yangi texnologiyalari va ilg`or ishlanmalari namoyishi bo`lib o`tdi.
Davlat rahbari kompaniya prezidenti Van Chuanfu bilan birga Jizzax viloyatida yiliga 50 ming dona gibrid va elektr avtomobillarni yig`ish bo`yicha loyihani ishga tushirishga bag`ishlangan tantanali marosimda ishtirok etdi.
Shavkat Mirziyoev yaqin istiqbolda bozordagi talabdan kelib chiqib modellar qatorini kengaytirish va ishlab chiqarish quvvatini yiliga 300 ming donagacha oshirish zarurligini ko`rsatib o`tdi.
Shuningdek, kompaniyaning O`zbekistonda "BYD" elektr avtobuslarini yig`ishni yo`lga qo`yish, ehtiyot qismlarini mahalliylashtirish va muhandislik-servis markazlarini tashkil etish borasidagi rejalari qo`llab-quvvatlandi.
Tashrif chog`ida kompaniya O`zbekistonga 10 minginchi avtomobilini etkazib berganining ramzi sifatida Shavkat Mirziyoevga YANGWANG U8 avtomobili hadya qilindi.
