Ijtimoiy tarmoqlarda avtobus yonib ketgani aks etgan video tarqaldi.
Holat bo`yicha “Toshshahartransxizmat” AJ Axborot xizmati ma`lumot taqdim etdi.
Ma`lum qilinishicha, hodisa bugun, 26 fevral kuni “Toshshahartransxizmat” AJning “7-avtobus saroyi” filialiga biriktirilgan “Mercedes-Benz” rusumli 33-sonli avtobusda sodir bo`lgan.
Qayd etilishicha, ushbu avtobus 2013 yil ishlab chiqarilgan bo`lib, haydovchi A.A. boshqaruvidagi avtobus, Yuqorichirchiq tumani, Bardanko`l—Jumabozor—Qiziltog` yo`li bo`ylab harakatlanayotgan vaqtda, tormoz tizimida nosozlik kelib chiqqani sababli yong`in yuz bergan.
FVV Yong`in qutqaruv bo`linmasi tezkor guruhi chaqirilib, yong`in qisqa vaqtda bartaraf etilgan. Mazkur hodisa oqibatida tan jarohati olganlar yo`q.
Hozirda “Toshshahartransxizmat” AJning Ishlab chiqarish texnik bo`limi xodimlari tomonidan xizmat tekshiruvi olib borilmoqda.
