Sirdaryoda otasidan qo`rqayotgan bolakay nevrozga chalingani, unga mutasaddilar yordami kerakligi haqida xabarlar tarqalgandi.
Prezident huzuridagi Ijtimoiy himoya milliy agentligi holatga munosabat bildirdi.
Qayd etilishicha, agentlikning Sirdaryo viloyati boshqarmasi tomonidan holatni o`rganish va nazoratga olish maqsadida ishchi guruh tashkil etilgan. Ishchi guruh tarkibiga mahalla fuqarolar yig`ini raisi, viloyat asab va ruhiy kasalliklar dispanseri psixiatrlari, viloyat bolalar ko`p tarmoqli tibbiyot shifokorlari jalb etilgan.
Dastlabki o`rganish davomida aniqlanishicha, Sirdaryo tumani “Quyosh” MFYda yashovchi 2018 yilda tug`ilgan R.A. 2020 yildan ota-onasining qarmog`isiz qolib ketgan. Bola 2020 yildan bola vaqtincha bobosi va buvisining uyida yashagan.
Oradan 3 yil o`tganidan so`ng bola Sirdaryo tumani hokimining 2023 yil 15 iyundagi qarori bilan “Vasiylik va homiylik to`g`risida”gi qonuni 10-19-21-moddalari hamda “Quyosh” MFY tomonidan tuzilgan dalolatnomaga asoslangan holda tog`asiga vasiylikka berilgan.
O`rganish davomida voyaga etmagan shaxs psixiator va nevropotolog ko`rigidan o`tkazildi va uning ruhiy holati yaxshi ekani, atrofdagilar bilan muloqotga oson kirishayotganligi kuzatildi.
Ammo shifokorlarning xulosalariga ko`ra, unda situasion nevroz, ya`ni otasi bilan uchrashgan vaqtida bolaning ruhiyatida salbiy o`zgarishlar sodir bo`lgani qayd etildi. Yuzaga kelgan holatni oldini olish maqsadida shifokorlar xulosasiga tayangan holda sud tomonidan ota va bolaning ko`rishish ishini vaqtincha to`xtatish taklifi bildirilgan.
