Jizzaxda ota xorijga chiqish uchun alimentni oldindan to‘lashiga to‘g‘ri keldi. Bu haqda MIB matbuot xizmati darakchi.uz'ga xabar berdi.
Qayd etilishicha, fuqarolik ishlari bo‘yicha sudining qaroriga asosan qarzdor K.S.dan undiruvchi M.S. foydasiga voyaga yetmagan farzandlarining moddiy ta’minoti uchun har oylik ish haqi va daromadidan aliment undirish belgilangan ijro varaqasi byuroning Paxtakor tuman bo‘limi ish yurituviga kelib tushgan.
Ijro harakatlari davomida qarzdor K.S. davlat ijrochilariga Rossiya Federatsiyasiga ishlash maqsadida, chiqishi lozim ekanligini, biroq unga nisbatan xorijga chiqish huquqi vaqtincha cheklanganligini bildiradi.
Shunda davlat ijrochilari qonunchilikka ko‘ra, aliment qarzdorligini oldindan to‘lab berish orqali chetga chiqishga bo‘lgan cheklov olinishini bildiradi.
Shu bois qarzdor K.S. voyaga yetmagan ikki nafar farzandlari uchun 50 mln. so‘m aliment pullarini oldindan undiruvchiga to‘lab berdi.
