Anqara Suriyaning yangi hukumatiga terrorchilik tashkilotiga qarshi zarur choralar ko‘rish maqsadi masalani hal qilish bo‘yicha har qanday ssenariyga tayyorgarlik ko‘rmoqda. Chegaradagi harbiy qismlar ehtimoliy operatsiya uchun jangovor shaylik holatiga keltirildi. Bu haqda Turkiye gazetesi xabar bermoqda.
Turkiya hukumati “Terrorsiz Turkiya” shiori ostida harakat qilib, Suriya va Iroqda PKK terrorchilik tashkilotini tugatish uchun barcha zarur choralarni ko‘rmoqda. Erdo‘g‘an hukumati Suriyaga infratuzilma, energetika, savdo va sog‘liqni saqlash sohalarida yordam berish hamda terrorchilikka qarshi qat’iy choralar ko‘rishni davom ettirmoqda.
Anqara Suriya yangi hukumati rahbari Ahmad ash-Shara’a bilan bir necha bor muzokaralar o‘tkazib, PKK/YPGning tugatilishi bo‘yicha talablarini ochiq bayon qildi.
Terrorchilarni yo‘q qilishning ikki bosqichi ko‘zda tutilmoqda. Birinchi bosqichda, Suriyadagi xorijiy terrorchilar mamlakatni tark etishi lozim. Ikkinchi bosqichda, YPGning butun rahbariyati, jumladan suriyalik terrorchilar ham, Suriyani tark etishi kerak. Suriya fuqarolari bo‘lganlari qurollarini topshirib, yangi tizimga integratsiya qilinishi shart.
Ta’kidlanishicha, Turkiya o‘z talablarining bajarilishidan manfaatdor bo‘lgani holda, har qanday ssenariyga tayyorgarlik ko‘rmoqda. Chegaradagi harbiy qismlar jangovor shay holatgaga keltirilgan. Milliy mudofaa vaziri Yashar Guler Bosh shtab boshlig‘i va qo‘mondonlar bilan Suriya chegarasidagi vaziyatni nazorat qilish va tekshiruv ishlarini o‘tkazdi.
Ta’kidlash joiz, Anqara AQSHning “ISHIDga qarshi kurash” bahonasi ostida PKK/YPGni qo‘llab-quvvatlashiga e’tiroz bildirmoqda. Turkiya ISHIDga qarshi kurashni yangi Suriya hukumati nazoratga olishga tayyorligini ta’kidlamoqda va zarur bo‘lsa, ushbu masalada o‘z harbiylarini ko‘makka jo‘natishini ma’lum qildi.
Ayni kunlarda Suriya Milliy Armiyasi ham front liniyasiga PKK/YPGga qarshi og‘ir qurollar va jangchilarni jo‘natdi. Barcha front chiziqlarida jangovor shaylik eng yuqori darajaga ko‘tarildi.
