Suriyaning shimolidagi Manbij shahrida mina o‘rnatilgan avtomobilning portlashi natijasida kamida 15 kishi halok bo‘ldi. Bu haqda Suriyaning rasmiy SANA agentligi "Oq kaskalar" fuqarolik mudofaa xizmatiga tayanib xabar berdi. Halok bo‘lganlardan 14 nafari ayol va 1 nafari erkak bo‘lib, yana 15 ayol yaralangan, ularning ayrimlari og‘ir ahvolda. Portlash Manbij shahri atrofidagi asosiy yo‘lda, qishloq xo‘jaligida ishlovchi ishchilarni tashuvchi mashina yaqinida sodir bo‘lgan.
Bu so‘nggi kunlarda Manbijda sodir bo‘lgan ikkinchi shunday hodisadir. Bundan avval, shanba kuni shahar markazida mina o‘rnatilgan avtomobilning portlashi natijasida to‘rt nafar tinch aholi halok bo‘lgan, yana to‘qqiz kishi, jumladan, bolalar ham yaralangan edi.
1 dekabrda Turkiya tomonidan qo‘llab-quvvatlanadigan Suriya ozodlik armiyasi "Erkinlik tajribasi" operatsiyasini boshlagan edi. Buning maqsadi shimoliy Suriyada xavfsizlikni tiklash deb e’lon qilingan. Tez orada kurd tuzilmalari nazoratida bo‘lgan Manbij shahri yangi suriyalik hokimiyat tarafdorlari qo‘liga o‘tdi. Bunga qadar, 2016 yildan beri, Manbij AQSH tomonidan qo‘llab-quvvatlanadigan Kurdiston ishchi partiyasi (RPK) va Xalq himoyasi bo‘linmalari (YPG) tomonidan nazorat qilinar edi. Bu hududda kurdlarning so‘nggi tayanch nuqtasi bo‘lib kelgan.
Abdulloh Sayyid
