Суриянинг шимолидаги Манбиж шаҳрида мина ўрнатилган автомобилнинг портлаши натижасида камида 15 киши ҳалок бўлди. Бу ҳақда Суриянинг расмий SANA агентлиги "Оқ каскалар" фуқаролик мудофаа хизматига таяниб хабар берди. Ҳалок бўлганлардан 14 нафари аёл ва 1 нафари эркак бўлиб, яна 15 аёл яраланган, уларнинг айримлари оғир аҳволда. Портлаш Манбиж шаҳри атрофидаги асосий йўлда, қишлоқ хўжалигида ишловчи ишчиларни ташувчи машина яқинида содир бўлган.
Бу сўнгги кунларда Манбижда содир бўлган иккинчи шундай ҳодисадир. Бундан аввал, шанба куни шаҳар марказида мина ўрнатилган автомобилнинг портлаши натижасида тўрт нафар тинч аҳоли ҳалок бўлган, яна тўққиз киши, жумладан, болалар ҳам яраланган эди.
1 декабрда Туркия томонидан қўллаб-қувватланадиган Сурия озодлик армияси "Эркинлик тажрибаси" операциясини бошлаган эди. Бунинг мақсади шимолий Сурияда хавфсизликни тиклаш деб эълон қилинган. Тез орада курд тузилмалари назоратида бўлган Манбиж шаҳри янги суриялик ҳокимият тарафдорлари қўлига ўтди. Бунга қадар, 2016 йилдан бери, Манбиж АҚШ томонидан қўллаб-қувватланадиган Курдистон ишчи партияси (РПК) ва Халқ ҳимояси бўлинмалари (YPG) томонидан назорат қилинар эди. Бу ҳудудда курдларнинг сўнгги таянч нуқтаси бўлиб келган.
Абдуллоҳ Саййид
