Ijtimoiy tarmoqlarda Samarqand viloyati Narpay tumanidagi 50-umumta’lim maktabi direktori maktab o‘quvchisini kaltaklagani aytilgan videoxabar tarqaldi.
Viloyat Maktabgacha va maktab ta’limi boshqarmasining holat yuzasidan ma’lum qilishicha, 8-"A" sinf o‘quvchisi Sh.I. 2025 yil 17 mart kuni biologiya darsida sinfdoshi bilan gaplashib, jim o‘tirmaganligi sababli o‘qituvchi K.O‘. tomonidan tanbeh berilgan.
Ammo o‘quvchi bundan xulosa chiqarmasdan, o‘qituvchini haqorat qilgan shundan so‘ng o‘qituvchi va o‘quvchi o‘rtasida tortishuv yuzaga kelgan.
Bu holatni o‘quvchilardan biri maktab direktoriga yetkazgan. Direktor sinfxonaga kelganda o‘quvchi Sh.I. o‘qituvchi K.O‘.ni yoqasidan ushlab turganligini ko‘rib ajratishga harakat qilgan va jahl ustida o‘quvchini yuziga tarsaki tushirganligini o‘z tushuntirish xatida bayon etgan.
Holat huquqni muhofaza qiluvchi organlar tomonidan o‘rganilmoqda.
