Rossiya va AQSH rasmiylari Riyodda Ukraina bo‘yicha "murakkab, ammo foydali" muzokaralar o‘tkazdi.
Rossiya va AQSH delegatsiyalari dushanba kuni Riyodda Ukraina mojarosi hamda xavfsizlik masalalariga bag‘ishlangan "batafsil va murakkab, ammo juda foydali" uchrashuv o‘tkazgan. Bu haqda seshanba kuni Rossiya delegatsiyasining rahbarlaridan biri Grigoriy Karasin ma’lum qildi.
Qayd etilishicha, 12 soatga cho‘zilgan ushbu muzokaralar fevral oyida tiklangan diplomatik muloqotdan beri eng uzoq davom etgan uchrashuvlardan biri bo‘ldi.
Karasinning bildirishicha, muzokaralar konstruktiv ruhda o‘tgan va muhim masalalar muhokama qilingan.
"Suhbat batafsil va murakkab bo‘ldi, ammo bu biz uchun ham, amerikaliklar uchun ham juda foydali bo‘ldi," – dedi u Rossiya matbuotiga.
"Ko‘plab muammolar muhokama qilindi. Albatta, hamma narsa hal qilinmadi, barcha masalalar bo‘yicha kelishuvga erishilmadi, ammo bunday muloqotning o‘zi juda dolzarb edi. Ayniqsa, yangi ma’muriyat vakillari va ekspertlar guruhlarining yangi a’zolari ishtirok etgani nuqtayi nazaridan," – deya qo‘shimcha qilgan Karasin.
Ma’lumotlarga ko‘ra, tomonlar qo‘shma bayonot ustida kelishib olgan va ushbu bayonot tez orada Kreml va Oq uy tomonidan e’lon qilinishi kutilmoqda.
Rossiya delegatsiyasi tarkibida Federal xavfsizlik xizmati (FSB) direktori maslahatchisi Sergey Beseda ishtirok etgan. AQSH tomonidan esa Davlat departamenti siyosiy rejalashtirish bo‘limi direktori Maykl Anton, Oq uy Milliy xavfsizlik kengashidan Endryu Pik, AQSH Prezidenti Donald Trampning Ukraina bo‘yicha maxsus vakili yordamchilari Kit Kellog hamda Milliy xavfsizlik bo‘yicha maslahatchi Mayk Uols qatnashgan.
Muzokaralar oldidan Kreml maslahatchisi Yuriy Ushakov Tramp va Putin o‘rtasida yaqinda bo‘lib o‘tgan qo‘ng‘iroqlashuv ortidan, Qora dengiz don tashabbusini qayta tiklash masalasi ham muhokama qilinishini bildirgan edi.
