Россия ва АҚШ расмийлари Риёдда Украина бўйича "мураккаб, аммо фойдали" музокаралар ўтказди.
Россия ва АҚШ делегациялари душанба куни Риёдда Украина можароси ҳамда хавфсизлик масалаларига бағишланган "батафсил ва мураккаб, аммо жуда фойдали" учрашув ўтказган. Бу ҳақда сешанба куни Россия делегациясининг раҳбарларидан бири Григорий Карасин маълум қилди.
Қайд этилишича, 12 соатга чўзилган ушбу музокаралар февраль ойида тикланган дипломатик мулоқотдан бери энг узоқ давом этган учрашувлардан бири бўлди.
Карасиннинг билдиришича, музокаралар конструктив руҳда ўтган ва муҳим масалалар муҳокама қилинган.
"Суҳбат батафсил ва мураккаб бўлди, аммо бу биз учун ҳам, америкаликлар учун ҳам жуда фойдали бўлди," – деди у Россия матбуотига.
"Кўплаб муаммолар муҳокама қилинди. Албатта, ҳамма нарса ҳал қилинмади, барча масалалар бўйича келишувга эришилмади, аммо бундай мулоқотнинг ўзи жуда долзарб эди. Айниқса, янги маъмурият вакиллари ва экспертлар гуруҳларининг янги аъзолари иштирок этгани нуқтаи назаридан," – дея қўшимча қилган Карасин.
Маълумотларга кўра, томонлар қўшма баёнот устида келишиб олган ва ушбу баёнот тез орада Кремль ва Оқ уй томонидан эълон қилиниши кутилмоқда.
Россия делегацияси таркибида Федерал хавфсизлик хизмати (ФСБ) директори маслаҳатчиси Сергей Беседа иштирок этган. АҚШ томонидан эса Давлат департаменти сиёсий режалаштириш бўлими директори Майкл Антон, Оқ уй Миллий хавфсизлик кенгашидан Эндрю Пик, АҚШ Президенти Доналд Трампнинг Украина бўйича махсус вакили ёрдамчилари Кит Келлог ҳамда Миллий хавфсизлик бўйича маслаҳатчи Майк Уолц қатнашган.
Музокаралар олдидан Кремль маслаҳатчиси Юрий Ушаков Трамп ва Путин ўртасида яқинда бўлиб ўтган қўнғироқлашув ортидан, Қора денгиз дон ташаббусини қайта тиклаш масаласи ҳам муҳокама қилинишини билдирган эди.
