“Harvard” universiteti huzuridagi “Growth Lab” markazi 2023-yil natijalari asosida e’lon qilgan so‘nggi reytingda O‘zbekiston 145 davlat orasida 80-o‘rinni egalladi. Bu so‘nggi besh yilda 25 pog‘onaga yuqorilaganini anglatadi.
Reytingga ko‘ra, O‘zbekiston eksporti yiliga o‘rtacha 20,5% ga oshgan bo‘lib, bu mintaqadagi eng yuqori ko‘rsatkichlardan biridir. So‘nggi besh yilda eksport portfeliga 67 ta yangi mahsulot qo‘shilgan va ular orqali 2,1 mlrd dollar daromad olingan. Bu esa aholiga jon boshiga 59 dollar foyda bergan.
Eng katta o‘sish transport vositalari (89 foiz), sanoat uskunalari (77 foiz) va elektrotexnika (59 foiz) eksportida kuzatildi.
Taqqoslash uchun: Turkiya 44-o‘rinda, Vetnam 53-o‘rinda, Qozog‘iston 84-o‘rinda (6 pog‘onaga pasaygan), Rossiya 94-o‘rinda, Tojikiston 124-o‘rinda (5 pog‘onaga ko‘tarilgan), Turkmaniston esa 126-o‘rinni egallagan (12 pog‘onaga tushgan).
Harvard tahlilchilariga ko‘ra, O‘zbekiston hozirda 162 turdagi mahsulot bilan jahon bozorida raqobatbardosh hisoblanadi. 2033-yilgacha mamlakat iqtisodiyoti yiliga o‘rtacha 5,6 foiz ga o‘sishi kutilmoqda — bu dunyoda ikkinchi eng yuqori prognoz.
