Toshkent viloyati Yuqori Chirchiq tumanida qum-shag‘al aralashmasi noqonuniy ravishda yuk mashinaga yuklatilgani aniqlandi. Bu haqda Ekologiya, atrof-muhitni muhofaza qilish va iqlim o‘zgarishi vazirligi matbuot xizmati ma’lum qildi.
Qayd etilishicha, Yuqori Chirchiq tumani Nurafshon MFY hududidan oqib o‘tuvchi Chirchiq daryosining muhofaza mintaqasiga yaqin joyda qum-shag‘al aralashmasi davlat raqami yechib olingan yuklagich yordamida yuk mashinalariga noqonuniy ravishda yuklab berilgan.
“Transport vositalarini vaqtinchalik saqlab turish uchun tuman hududida joylashgan jarima maydonchasiga joylashtirish vaqtida haydovchilar qonuniy talablarga bo‘ysunmay, voqea joyidan qochib ketdi”,— deyiladi xabarda.
Huquqbuzarlik oqibatida tabiatga 4 milliard 347 million 712 ming 454 so‘m miqdorida zarar yetkazilgan. Holat bo‘yicha to‘plangan hujjatlar Toshkent viloyati Prokuraturasiga yuborilgan.
