Тошкент вилояти Юқори Чирчиқ туманида қум-шағал аралашмаси ноқонуний равишда юк машинага юклатилгани аниқланди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати маълум қилди.
Қайд этилишича, Юқори Чирчиқ тумани Нурафшон МФЙ ҳудудидан оқиб ўтувчи Чирчиқ дарёсининг муҳофаза минтақасига яқин жойда қум-шағал аралашмаси давлат рақами ечиб олинган юклагич ёрдамида юк машиналарига ноқонуний равишда юклаб берилган.
“Транспорт воситаларини вақтинчалик сақлаб туриш учун туман ҳудудида жойлашган жарима майдончасига жойлаштириш вақтида ҳайдовчилар қонуний талабларга бўйсунмай, воқеа жойидан қочиб кетди”,— дейилади хабарда.
Ҳуқуқбузарлик оқибатида табиатга 4 миллиард 347 миллион 712 минг 454 сўм миқдорида зарар етказилган. Ҳолат бўйича тўпланган ҳужжатлар Тошкент вилояти Прокуратурасига юборилган.
