2024 yil mart oyida Xonobod shahar “A.Navoiy” mahallasida Qirg‘iz Respublikasining Jalolobod viloyati bilan bog‘lovchi yashirin tunnel topildi. Yer osti yo‘lagi orqali tovarlarni noqonuniy tashish tashkil etilgani aniqlandi. Bu haqda “Darakchi.uz”ga DXX ma’lum qildi.
“Tonnabop” mobil telefonlar va oltin
Qirg‘iziston fuqarosi 5 mlrd 954 mln so‘mlik 812 dona mobil telefonni O‘zbekistonga olib o‘tishga, 1 mlrd 558 mln so‘mlik 1,7 kg nostandart oltinni mamlakatdan olib chiqishga uringan paytda qo‘lga olindi.
Sheriklar ham fosh bo‘ldi
Andijon shahri va Oltinko‘l tumanida yashovchi 3 nafar fuqaroning manzillaridan qo‘shimcha ravishda 2 mlrd 839 mln so‘mlik texnika buyumlari aniqlandi. Ular orasida mobil telefonlar, quloqchinlar, adapterlar va USB kabellar bo‘lgan.
Yer osti tunneli qanday qurilgan?
Tunnel 18-20 metr chuqurlikda, 60-70 sm kenglikda va 170-180 sm balandlikda bo‘lib, uzunligi 300-350 metrni tashkil etgan. Guruh a’zolari vazifalarini aniq taqsimlashgani ma’lum bo‘ldi.
Sud hukmi: ozodlikdan mahrum etildi
Andijon shahar sudi Qirg‘iziston fuqarosini 6 yilga, 3 nafar O‘zbekiston fuqarosini esa 5 yilga ozodlikdan mahrum qildi. Ulardan olingan barcha mol-mulk va yashirin tunnel davlat foydasiga musodara qilindi.
Ikkinchi tunnel ham topildi
Xonobodda yana bir yer osti yo‘lagi aniqlanib, u ham sud qarori bilan yo‘q qilindi. Uy va undagi ashyoviy dalillar davlat foydasiga musodara qilindi. Uy egasi 5 yilga qamaldi.
Qonunbuzarliklarga qarshi kurash davom etadi
Tergov davomida qo‘shni davlatdan olib kelingan mobil telefonlar Andijon va Toshkentdagi savdo markazlarida sotilgani ma’lum bo‘ldi. Huquq-tartibot organlari bunday jinoyatlarga qarshi qat’iy kurashishni davom ettirmoqda.
