Hindiston Tashqi ishlar vazirligi Pokistonni Kashmir mintaqasida dron hujumlari uyushtirish va harbiy obyektlarga zarba berishda aybladi. Vazir o‘rinbosari Vikram Misrining ta’kidlashicha, bu bilan Pokiston avval erishilgan o‘t ochishni to‘xtatish kelishuvini buzgan, deya yozmoqda "Zamon.uz".
“Pokiston harbiy harakatlarni to‘xtatish bo‘yicha bitimni buzdi. Hindiston armiyasi hozirda zaruriy javob choralari ko‘rmoqda”, — dedi Misri.
Hindiston tomoni Islomobodni vaziyatni zudlik bilan nazoratga olishga chaqirdi. Rasmiylar harbiy keskinlikning oshishiga yo‘l qo‘yilmasligini ta’kidlamoqda.
Pokiston bosh vaziri Shaboz Sharif esa Hindiston tomonidan ilgari surilgan ayblovlarni qat’iyan rad etdi.
“Pokiston mustaqilligiga shubha qilgan har qanday tomon bilsin: biz o‘z himoyamiz uchun barcha zarur chora-tadbirlarni ko‘ramiz”, — deya bayonot berdi Sharif.
