AQShning sobiq prezidenti Jo Baydenga prostata bezi saratonining “agressiv shakli” tashxis qo‘yildi. Bu haqda “The New York Times” nashri prezident matbuot kotibiga tayanib xabar berdi.
Ma’lum qilinishicha, 16-may, juma kuni tibbiy ko‘rik vaqtida shifokorlar Jo Baydenning prostata bezida kichik tuguncha aniqlagan. Bu esa yana qo‘shimcha tekshiruvlar o‘tkazishni talab qilgan.
“NBC News” xabariga ko‘ra, aniqlangan saraton kasalligi suyaklarga ham metastaz qilgan, ya’ni saraton hujayralari boshqa joylarga ham tarqalgan.
Shunga qaramay, matbuot kotibi so‘zlariga ko‘ra, bu turdagi saraton gormonlarga sezuvchan bo‘lib, uni davolashning samarali usullari mavjud. Hozirda Bayden va uning oilasi shifokorlar bilan birgalikda davolanish yo‘llarini o‘rganmoqda.
