АҚШнинг собиқ президенти Жо Байденга простата бези саратонининг “агрессив шакли” ташхис қўйилди. Бу ҳақда “The New York Times” нашри президент матбуот котибига таяниб хабар берди.
Маълум қилинишича, 16 май, жума куни тиббий кўрик вақтида шифокорлар Жо Байденнинг простата безида кичик тугунча аниқлаган. Бу эса яна қўшимча текширувлар ўтказишни талаб қилган.
“NBC News” хабарига кўра, аниқланган саратон касаллиги суякларга ҳам метастаз қилган, яъни саратон ҳужайралари бошқа жойларга ҳам тарқалган.
Шунга қарамай, матбуот котиби сўзларига кўра, бу турдаги саратон гормонларга сезувчан бўлиб, уни даволашнинг самарали усуллари мавжуд. Ҳозирда Байден ва унинг оиласи шифокорлар билан биргаликда даволаниш йўлларини ўрганмоқда.
