AQSH prezidenti Donald Tramp Eron bilan yadroviy kelishuv yaqin ekanini ma’lum qilib, Isroil bosh vaziri Binyamin Netanyaxuga Eron yadroviy obyektlariga hujum qilmaslikni tavsiya qilganini aytdi. Trampning ta’kidlashicha, muzokaralar samarali kechmoqda va yaqin haftalarda kelishuvga erishish mumkin.
Trampning bu bayonoti Eronning uran boyitishni vaqtincha to‘xtatish va muzlatilgan mablag‘larning yechilishi evaziga AQSH tomonidan yadroviy huquqlarining tan olinishi haqidagi takliflari fonida yangradi. Eron muzokaralarda uran boyitishni to‘liq to‘xtatish yoki yadroviy infratuzilmasini demontaj qilishni rad etmoqda.
Trampning maxsus vakili Stiv Uitkoff boshchiligidagi AQSH delegatsiyasi Eron bilan muzokaralarni olib bormoqda. Eron tashqi ishlar vaziri Abbas Aragchi esa muzokaralarda AQSH inspektorlariga yadroviy obyektlarga kirish huquqi berishga tayyor ekanini bildirgan.
Isroil rasmiylari Trampning Eron bilan kelishuvi ularning xavfsizligiga tahdid solishi mumkinligini ta’kidlab, agar Eron uran boyitishni to‘xtatmasa, mustaqil ravishda harbiy choralar ko‘rishlari mumkinligini bildirishmoqda.
Trampning Eron bilan yangi kelishuvga intilishi uning 2018 yilda Obama davridagi yadroviy kelishuvdan chiqish qaroridan farqli o‘laroq, diplomatik yechimlarga qaytishga harakatini ko‘rsatadi.
Abdulloh Sayyid
