Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси Uzum Market МЧЖ ХК томонидан билдирилган расмий мурожаатни кўриб чиқди.
Мурожаатда “YandexGo” UB МЧЖ томонидан оммавий ахборот воситаларида, хусусан телевидение ва ижтимоий тармоқлар орқали эълон қилинган Yandex Market реклама материали орқали Uzum Market обрўсига путур етказилиши ҳолатлари қайд этилган.
Қўмитанинг тегишли махсус комиссияси томонидан ушбу мурожаат юзасидан ўрганиш ишлари олиб борилди ҳамда натижаларга кўра, “Рақобат тўғрисида”ги қонуннинг 21-моддаси талаблари бузилиши аломатлари аниқланиб, YandexGo UB МЧЖга нисбатан қонуний тартибда иш қўзғатилди.
Мазкур модда доирасида хўжалик юритувчи субъектларнинг рақобатбардош фаолиятига ғов бўлувчи бир қатор ҳаракатлар, хусусан рақобатчиларни обрўсизлантириш, нотўғри таққослаш, истеъмолчиларни чалғитиш, тижорат сирини ноқонуний тарзда эгаллаш ва рақобатчиларни бозорга киришига сунъий тўсиқлар қўйиш каби ҳолатлар қатъий тақиқланади.
Рақобат қўмитаси бу каби ҳолатларга нисбатан қатъий позицияда бўлиб, тадбиркорлик муҳитининг соғлом ва адолатли рақобат тамойиллари асосида шаклланишини таъминлашга интилади. Иш доирасида барча тегишли материаллар чуқур таҳлил қилиниб, қонуний баҳо берилиши таъминланади.
