Amerika Qoʻshma Shtatlarining Pensilvaniya shtatida joylashgan "Moshannon Valley Processing Center" muassasasida Xitoy fuqarosi Chaofeng Ge oʻlik holda topildi. Bu haqda "ABC news" maʼlum qildi.
Qayd etilishicha, xitoylik mahbus AQShning immigratsiya va bojxona nazorati xizmati – ICE tomonidan hibsga olingan va atigi 5 kun muqaddam shu markazga joylashtirilgan.
32 yoshli Ge dushxonada boʻyin qismidan osilgan holatda aniqlandi. Tergov davomida voqea joyidan yozilgan xat topilgan va hech qanday jinoyat izlari aniqlanmagan. Mutasaddilar bu holatni oʻz joniga qasd deb baholamoqda.
Maʼlumot uchun, Chaofeng Ge yanvar oyida kredit karta firibgarligida gumon qilinib, politsiya tomonidan hibsga olingan. U jinoyatni tan olgan va 6 oydan 12 oygacha ozodlikdan mahrum etilgan.
Ammo sud hukmi chiqarilgan zahoti ICE konteyneri asosida u immigratsiya markaziga topshirilgan.
ICE matbuot xizmati hodisaga munosabat bildirib, hibsdagi shaxslar uchun tibbiy va ruhiy salomatlik tekshiruvlari oʻz vaqtida oʻtkazilishini taʼkidladi. AQSh Ichki xavfsizlik departamenti (DHS) esa bunday oʻlim holatlari jiddiy nazorat ostida oʻrganilishini aytdi.
Mazkur voqea ICE markazlarida muhojirlar bilan qanday munosabatda boʻlinayotgani, u yerda ruhiy salomatlikga qanchalik eʼtibor qaratilayotgani borasida yana bir bor savollarni oʻrtaga chiqarmoqda.
