Joriy yilning 2 sentabriga o‘tar kechasi Rostov shahri dronlar hujumiga uchradi. Shundan so‘ng bir uyda xavfli topilma aniqlandi, odamlar maktab binosiga vaqtincha ko‘chirildi.
Rostov viloyati vaqtincha gubernatori Yuriy Slyusarning ma’lumotiga ko‘ra, "portlamagan snaryad" shahardagi ko‘p qavatli uylardan birining xonadonida topilgan. Aholining xavfsizligini ta’minlash maqsadida 320 nafar fuqaro evakuatsiya qilingan, ular vaqtincha maktab binosiga joylashtirilgan.
Snaryadning turi va kelib chiqish sabablari hozircha ochiqlanmadi. Shuningdek, 2 sentabrga o‘tar kechasi Rostov shahri dronlar hujumiga uchragani, shahar g‘arbiy chekkasi va Krasniy Krım qishlog‘i yaqinida yong‘in kelib chiqqani, u tez orada bartaraf etilgani bildirildi.
Hujum natijasida shahardagi bir nechta bino zarar ko‘rgan, uch nafar katta yoshli va bir bola shifokorlarga murojaat qilgan. Rossiya Mudofaa vazirligi bayonotiga ko‘ra, hujum vaqtida 13 ta uchuvchisiz uchish apparati (UUА) urib tushirilgan.
