2026 yil 1 yanvardan boshlab O‘zbekistonda transport vositalari uchun chiroyli davlat raqami belgilarini auktsion orqali sotish tartibi bekor qilinadi. Bu haqda Vazirlar Mahkamasining joriy yilning 4 sentabr kuni qabul qilingan “Avtomototransport vositalari uchun ro‘yxatdan o‘tkazish davlat raqami belgilarini berish tartibini soddalashtirish chora-tadbirlari to‘g‘risida”gi qarorida so‘z boradi.
Ma’lum qilinishicha, fuqarolar uchun auktsion savdolarida ishtirok etish tartibi murakkab va ko‘p vaqt talab etishi, ayrim toifadagi davlat raqami belgilari uchun boshlang‘ich narxlari yuqoriligi keng aholi qatlami uchun bunday raqamlarni sotib olish imkoniyatini cheklamoqda.
2026 yil 1 yanvardan boshlab, O‘zbekiston respublika tovar-xomashyo birjasi (O‘zRTXB) tizimida har qanday raqam belgilarini sotish bo‘yicha auktsionlar, shuningdek, xaridorgir raqamlarni oshirilgan stavkalarda berish tartibi bekor qilinadi.
Yangi tartibga ko‘ra, 2026 yil 1 yanvardan boshlab jismoniy va yuridik shaxslar to‘g‘ridan-to‘g‘ri elektron murojaat asosida online rejimda uzluksiz ravishda yangilanib turadigan yagona ochiq ma’lumotlar bazasida bosh turgan istalgan harf va raqamlar kombinatsiyasiga ega bo‘lgan davlat raqami belgilarini tanlab olishi mumkin bo‘ladi.
Tanlangan raqam yagona oshirilgan to‘lov evaziga beriladi, uning miqdori esa 2025 yil 1 oktyabrdan boshlab, “Uzavtomotobelgi” davlat unitary korxonasi tomonidan belgilanadi. O‘zRTXB 2025 yil 1 oktyabrdan boshlab chiroyli davlat raqami belgilarining auktsion savdolarini to‘xtatadi.
Auktsionda sotib bo‘linmagan yoki ishlab chiqarilib, sotilmagan xaridorgir 1 dan 3-toifagacha bo‘lgan avtoraqamlar “Uzavtomotobelgi” yangilangan yagona oshirilgan to‘lov evaziga, 4−6-toifadagilari esa xaridorgir harf va raqamlar kombinatsiyasiga ega bo‘lmagan davlat raqami belgilarini berishning amaldagi tartibida beriladi.
