Bolalar ombudsmani bolalar uchun sifatsiz oziq-ovqat mahsulotlarini yetkazib bergan subyektlarning mazkur faoliyat bilan qayta shug‘ullanishiga yo‘l qo‘ymaydigan qat’iy mexanizm joriy etilishi shartligini bildirdi.
Qayd etilishicha, bolalar ovqatlanishi xavfsizligini ta’minlashga oid qonunchilik talablari va belgilangan standartlarga rioya etmaslik, bu borada nazorat mexanizmlarining etarli samarali yo‘lga qo‘yilmaganligi oqibatida bolalar salomatligiga zarar yetishi holatlari yuzaga kelmoqda.
Toshkent viloyatining qator tumanlaridagi maktabgacha ta’lim tashkilotlarida kuni kecha yuz bergan salbiy vaziyat aynan shundan dalolat beradi.
Albatta, tergov organlari tomonidan holatga to‘liq huquqiy baho berilib, barcha aybdor shaxslarga qonun doirasida qat’iy javobgarlik choralari ko‘rilishi shart.
Shu bilan birga, bunday noxush holatlarning oldini olish, jumladan ta’lim muassasalarida bolalarni ovqatlanishi xavfsizligini ta’minlash maqsadida sohani tartibga soluvchi standartlarga rioya qilinishi ustidan alohida qat’iy sifat nazorati o‘rnatilishi lozim.
Bunday sifat nazorati mexanizmi bolalar ovqatlanishiga oid xizmatlarni ko‘rsatish tizimini doimiy monitoring qilish orqali amalga oshirilishi kerak. Xususan, xizmat ko‘rsatuvchi (autsorser) korxonalar o‘z faoliyatida sanitariya qoidalari, normalari va gigiena normativlariga muvofiq olib borayotganligi, oziq-ovqat mahsulotlarining belgilangan talablarga javob berishi va boshqa standartlarga rioya etish darajasi doimiy o‘rganilishi kerak.
Shuningdek, bolalar ovqatlanishiga oid xizmatlarni ko‘rsatishga oid shartnomalar tuzishda inson omilini minimallashtirish orqali korrupsion xavflarni bartaraf etish zarur.
Yana bir muhim preventiv chora — bolalar uchun sifatsiz oziq-ovqat mahsulotlarini yetkazib bergan subyektlarning mazkur faoliyat bilan qayta shug‘ullanishiga yo‘l qo‘ymaydigan qat’iy mexanizm joriy etilishdir.
Bola huquqlari bo‘yicha vakil tomonidan bolalar ovqatlanishi xavfsizligi sohasidagi muammolarni o‘rganish natijalari va ularni bartaraf etish yuzasidan takliflar mutasaddi idoralarga taqdim etiladi.
Bolalar salomatligi — millat salomatligi demakdir, uni saqlash uchun barcha zarur choralarni ko‘rishimiz, har qanday xatarli omillarni bartaraf etishimiz shart.
