Hindistonda yo‘talga qarshi siroplar taqiqlandi. Bunga mamlakating ayrim hududlarida so‘nggi bir oy ichida 14 nafar bolaning noma’lum sababdan vafot etgani sabab qilib ko‘rsatilmoqda.
Qurbonlar Maharashtra shtatidagi Nagpur va Madhya Pradeshdagi Chhindvara shaharlarida qayd etilgan, ularning aksari qishloqlarda yashagan. Bolalarda dastlab yengil shamollash alomatlari, xususan, isitma va yo‘tal kuzatilgan. Lekin ularning ahvoli birdaniga og‘irlashib, ayrimlari kasalxonaga yotqizilgandan keyin 24 soat ichida hushini yo‘qotgan. Qurbonlarning ko‘pchiligida buyrak yetishmovchiligi aniqlandi, sun’iy nafas oldirish va gemodializga muhtoj bo‘lib qolgan. Ammo bu chora-tadbirlar ularni saqlab qolishga yetarli bo‘lmagan.
Chhindvaraning Parasiya shahrida 3–10 yosh oralig‘idagi 6 nafar bola shu tarzda vafot etgan. Doktor Naresh Gunnedaga ko‘ra, bolalardan tahlil namunalari olinib, tekshiruvga yuborilgan, natijalar hali e’lon qilinmagan.
Shundan so‘ng, rasmiylar vafot etgan bolalarning uylaridan topilgan ba’zi dori vositalarini, xususan yo‘tal siroplarini vaqtincha sotishni va ulardan foydalanishni taqiqlagan. Doktor Gunmade bu holat yuqumli kasallik emas, balki zaharlanish bilan bog‘liq bo‘lishi mumkinligini aytmoqda.
Boshqa bir taxminga ko‘ra, ayrim o‘lim holatlari kamqov Chandipura virusi bilan bog‘liq bo‘lishi mumkin. Bu virus miya yallig‘lanishini (entsefalit) keltirib chiqaradi va hozircha unga qarshi vaktsina mavjud emas. Shunga o‘xshash yana bir virus – Yapon entsefaliti esa vaktsinatsiya orqali oldini olish mumkin.
Ekspertlarning aytishicha, bu kabi holatlarda bemorda isitma, tutqanoq, ong chalkashishi, hatto falaj yoki koma holati kuzatiladi. O‘lim holatlari 20-30 foizgacha yetishi mumkin. Ta’kidlanishicha, bu safargi holatlar ba’zilarida entsefalit (virusli yallig‘lanish) emas, balki entsefalopatiya (zaharlanish yoki atrof-muhit ta’siri oqibati) sifatida qayd etilgan.
Markaziy hukumat vaziyatni o‘rganish uchun Virusologiya milliy instituti va Kasalliklarni nazorat qilish milliy markazi mutaxassislarini Nagpur va Chhindvara shaharlariga yuborgan.
Ayni paytda Rajasthan shtatida ham ikki nafar bolaning o‘limi bo‘yicha alohida tekshiruv ishi boshlandi. Ular hukumat klinikasidan olingan yo‘tal siropini ichish oqibatida so‘ng vafot etgan. Yana 8 nafar bolaning ahvoli ham og‘irlashgan, biroq ular tuzalib ketgan.
Rasmiylarga ko‘ra, bu sirop davlat sog‘liqni saqlash muassasalari orqali tarqatilgan. Hozirda siropning 22 ta partiyasi taqiqlangan. Bir shifokor dori xavfsizligini isbotlash maqsadida uni o‘zi ichgan va hushini yo‘qotgan.
Rajasthandagi Bayana tuman sog‘liqni saqlash markazi rahbari doktor Tarachand Yogi siropni ichib, 8 soatga hushidan ketgan. Birinchi o‘lim holati Sivar tumanda 5 yoshli bolada qayd etilgan. U sirop ichganidan so‘ng ahvoli yomonlashgan va ertasi kuni vafot etgan.
