G‘azo hukumat matbuot idorasi ma’lumotiga ko‘ra, 7 oktyabr kuni to‘liq ikki yil bo‘ladigan mojaro davomida 20 mingdan ortiq bola, 12 ming 500 dan ziyod ayol va yuzlab tinch aholi vakillari hayotdan ko‘z yumgan.
Shuningdek, 460 kishi, jumladan 154 bola ochlik va oziq-ovqat tanqisligi sabab vafot etgan, 17 kishi esa sovuqdan muzlab halok bo‘lgan. 7 oktyabrdan beri o‘lgan falastinliklar soni 67 mingdan oshgan, bedarak yo‘qolganlar bilan bu raqam 76 mingdan ortiqni tashkil etadi.
Isroil hujumlari sog‘liqni saqlash va ta’lim tizimlarini ham izdan chiqargan — 38 ta shifoxona vayron qilingan, 668 ta maktab bombalangan, 13 mingdan ortiq o‘quvchi va yuzlab o‘qituvchilar halok bo‘lgan.
G‘azo hukumat bayonotida Isroilning so‘nggi ikki kunda amalga oshirgan 130 dan ortiq hujumlari oqibatida yana 94 kishi, jumladan ayollar va bolalar halok bo‘lgani, bu esa "Falastin xalqiga qarshi davom etayotgan bosqinning bir qismi" ekani qayd etilgan.
