O‘zbekiston Respublikasi Prezidenti Administratsiyasi huzuridagi Narkotiklarni nazorat qilish milliy markazi katta inspektori Muhammadqodir Mahmudovning aytishicha, so‘nggi vaqtlarda narkotik moddalar faqatgina an’anaviy ko‘rinishdagina emas, balki energetik ichimliklar, qahva, shirinliklar va hatto kuch beruvchi oziq-ovqatlar tarkibida ham uchramoqda.
Bu holatning eng xavfli jihati — bir marta iste’mol qilishning o‘zida odamni modda ta’siriga tushirib, ruhiy va jismoniy qaramlikka olib kelishidir. Mutaxassislar bu jarayonni “sezilmas xavf” deb atamoqda, chunki zamonaviy narkotiklar tashqi belgilar orqali darrov sezilmaydi.
Statistik ma’lumotlarga ko‘ra, 2024 yilda 5 ta, 2025 yilning dastlabki 6 oyida esa 8 ta yashirin narkolaboratoriya aniqlandi. Yana bir og‘riqli fakt — talabalar orasida narkojinoyatlarga aralashish holatlari ortmoqda. Bu yilning o‘zida 46 nafar oliygoh talabasining narkosavdoga aloqadorligi aniqlandi.
Mutassaddilar va mutaxassislar ota-onalarni hushyor bo‘lishga chaqirmoqda. Chunki bugungi kunda yoshlarning narkotik moddalarga tushib qolishi ko‘p hollarda oila a’zolari tomonidan vaqtida sezilmayapti.
