Navoiy viloyati, Qiziltepa tumanida yashovchi erkak 4 nafar farzandi uchun alimentdan voz kechmagan sobiq turmush o‘rtog‘ini ataylab mashinada urib yubordi.
Buning oqibatida ayol og‘ir jarohat olib, belidan past qismi falaj bo‘lib qolgan. Bu haqda Nemalchi.uz loyihasi viloyat sudining hujjatlariga tayanib xabar berdi.
Qayd etilishicha, ayol uzoq yillar davomida eri tomonidan muntazam kaltaklangan. Ajrashish jarayonida sud 12 avgust kuni er-xotinga 3 oy muhlat bergan va erkakka 4 nafar voyaga yetmagan farzandi uchun aliment to‘lash majburiyatini yuklagan.
Biroq oradan bir kun o‘tib, 13 avgust kuni Shahriyor Zamiraga qo‘ng‘iroq qilib, alimentdan voz kechishini talab qilgan. Ayol rad javobini bergach, 14 avgust kuni Shahriyer Damas mashinasida uni urib yuborgan. Jabrlanganuvchi ayolning umurtqasi singan, asab tolalari shikastlangan, va hozirda u yura olmaydi. Oilasi og‘ir ahvolda davolanish xarajatlarini qoplash uchun qarzga botgan.
Ayolning yaqinlari zolim erkak davolanish xarajatlariga hissa qo‘shishdan bosh tortganini bildirgan. Unga nisbatan Jinoyat kodeksining 266-moddasi – "Transport vositalari harakati xavfsizligi qoidalarini buzish" bo‘yicha jinoyat ishi qo‘zg‘atilgan. Biroq hozirgacha u hibsga olinmagan va Zamiraga yozib, "yaxshi narsa bo‘lmaydi", deya tahdid qilishda davom etmoqda.
Nemalchi.uz usbu holatni keskin qoralab, savollar qo‘ymoqda:
"Nega ayolni qasddan urib yuborilganiga qaramay, bu urinish o‘ldirishga sui-qasd deb baholanmadi? Nega jinoyatchi er hibsga olinmadi? Va eng muhimi – nega ayollar hayotini himoya qilish mexanizmlari hali zaif?"
