Ikki yil davom etgan qonli urush va bombardimonlardan so‘ng G‘azo aholisi nihoyat tinchlik umidini ko‘rdi — ular o‘t ochish to‘xtatilishi haqidagi kelishuvni nishonlash uchun ko‘chalarga chiqdi.
Tun bo‘lishiga qaramasdan, minglab odamlar shodlik bilan raqsga tushib, shiorlar aytdi. Bolalar ham kattalarga qo‘shilib, urushning tugagani haqidagi xabarni "bayram" sifatida qarshi oldi. Jurnalistlar joydan reportajlar uzatib, ayrimlari ustlaridagi harbiy kiyimlarini yechib tashlagan — bu esa janglar so‘nggi bosqichga yetganini anglatdi.
8 oktyabr kuni Donald Trump Isroil va HAMAS o‘rtasida tinchlik rejasining birinchi bosqichi bo‘yicha kelishuvga erishilganini ma’lum qildi. Unga ko‘ra, garovdagi isroilliklar 13 oktyabr kuni ozod etiladi, Isroil esa qo‘shinlarini kelishilgan chiziq ortiga olib chiqadi.
Muzokaralar Misrning Sharm-ash-Shayx shahrida Qatar, Misr va Turkiya vositasida o‘tdi. AQSh esa Yaqin Sharq bo‘yicha maxsus vakillari orqali jarayonda ishtirok etdi.
