Namangandagi voqea — faqat bir pedofilning razolati emas, bu jinoyatni yillar davomida “axloq tuzatish ishlari” degan yumshoq ifoda bilan oqlab kelgan tizimning yuzi. Bolaning hayoti bilan o‘ynash mumkin emas. Bu faqat jinoyat emas — insoniyatka qarshi qo‘zg‘olon.
Shunday pedofillar jazo muddatini “yaxshi xulq” bahonasi bilan qisqartirib, ko‘chada erkin yurgani — davlatning bolaga bo‘lgan munosabatidan darak. Qonun faqat qog‘ozda emas, hayotda ham qattiq bo‘lishi kerak. Bunday jinoyatchilar uchun kechirish, yengillik yoki “yaxshi xulq” degan gap bo‘lmasligi shartligining yana bir isbotiga guvoh bo‘ldik.
Qonunchiligimizda 2024 yilda Jinoyat kodeksiga o‘zgartirish kiritilgan, unga ko‘ra jazoning o‘talmasgan qismini yengilrogi bilan almashtirish 18 yoshga to‘lmagan jabrlanuvchining nomusiga tekkanlik yoki unga nisbatan zo‘rlilik ishlatib, jinsiy ehtiyojni g‘ayritabiiy usulda qondirganlik uchun qo‘llanmaydi. Ammo bugun asrash uchun qonunchilikni yanada qat’iy jazo choralarini qo‘llashimiz zarur deb hisoblayman.
Mening talabim qat’iy, bolalarga nisbatan har qanday jinsiy zo‘ravonlik uchun umrbod ozodlikdan mahrum qilish jazosi qonun darajasida belgilashning vaqti keldi.
Bola — millatning kelajagi degan so‘zni ko‘p aytamiz. Lekin har bir bunday voqea shu so‘zni yolg‘onga chiqarayapti. Agar biz hali ham shunday pedofillarga yengil munosabatda bo‘lsak, demak, kelajakni qo‘limiz bilan yo‘q qilayapmiz.
Dilnoza Azizova
Oliy Majlis Qonunchilik palatasi deputati, "Milliy tiklanish" DP fraktsiyasi a'zosi
