Ijtimoiy tarmoq orqali "Tanqid uchun jarima undirilishi qonuniymi?" mazmunida qoldirilgan murojaat fuqarolarning ko‘plab muhokamalariga sabab bo‘ldi.
Jumladan, murojaatda qurilish tashkiloti — "Golden House Property Group" MChJ iste‘molchi o‘z tashabbusi bilan shartnomani bekor qilgan taqdirda to‘langan mablag‘ning yoki shartnoma qiymatining 10 foizi miqdorida jarima undirish huquqiga egaligi, shuningdek, mijozlar ushbu kompaniya faoliyatidan norozilik bildirib rasmiy idoralar yoki OAVga murojaat qilgan taqdirda ham ularga nisbatan jarima qo‘llanishi belgilanganligi qayd etilgan.
Raqobat qo‘mitasi tomonidan o‘rganishlar olib borilib, "Golden House" kompaniyasi ulush kirish asosida ko‘p qavatli uydan xonadon sotib olish shartnomalarida aynan shunday tartib joriy etgani aniqlandi. Bu esa iste‘molchi huquqlarini cheklovchi shart hisoblanadi.
Shu munosabat bilan Raqobat qo‘mitasi O‘zbekiston Respublikasining "Iste‘molchilar huquqlarini himoya qilish to‘g‘risida"gi Qonuni 4, 6, 21 va 23-moddalari talablariga asosan, kompaniyaga qonun buzilish holatlarini ixtiyoriy ravishda bartaraf etish bo‘yicha rasmiy ko‘rsatma berdi.
