Ma'lumotlarga ko'ra, Imomg‘uli prezident Rajab Toyib Erdo‘g‘onning asosiy siyosiy raqibi hisoblanadi. U mart oyidan beri korruptsiya ayblovlari bilan tergov izolyatorida saqlanmoqda.
Shahar prokuraturasi faqat merni emas, balki yana 401 nafar shaxsni jinoyat ishiga jalb etgan. Ular Imomg‘uli "asos solgan va boshqargan" deb hisoblangan korruptsiyon tarmoq a'zolari sifatida ko‘rsatilgan.
Prokuror Akin Gyurlekning ma'lumoticha, gumonlanuvchilar pora olish, berish va pul yuvish bilan shug‘ullangan katta jinoyiy uyushma tuzgan. Davlatga yetkazilgan zarar 160 milliard lira (taxminan 3,8 milliard dollar) deb baholangan.
Imomg‘uli 2028 yilgi prezidentlik saylovlarida ishtirok etish niyatida bo‘lgan. Unga nisbatan 12 ta poraxo‘rlik, 7 ta jinoyiy daromadlarni legalashtirish va 7 ta davlat muassasasiga nisbatan firibgarlik ayblovi qo‘yilgan.
"Anadolu" agentligining xabariga ko‘ra, ayblovlar jami 2430 yillik qamoq jazosini nazarda tutadi. Mart oyida uning hibsga olinishi Istanbulda norozilik namoyishlariga sabab bo‘lgan.
Shuningdek, prokurorlar Imomg‘ulini josuslik va diplomni qalbakilashtirishda ham ayblamoqda. Istanbul universiteti uning diplomini bekor qilgan, bu esa uning prezidentlikka nomzod bo‘lish imkoniyatini shubha ostiga qo‘ygan.
Imomg‘uli esa bu ayblovlarni siyosiy tazyiq deb atagan va "sud tizimi hokimiyat qo‘lidagi siyosiy vositasiga aylantirilgan", deya bayonot bergan.
