Prezidentning 11 dekabrdagi qaroriga ko‘ra, OAV, nashriyot va raqamli axborot sohalariga oid barcha nazorat funktsiyalari endi Raqamli texnologiyalar vazirligi huzuridagi maxsus inspektsiya tomonidan amalga oshiriladi.
PQ–371-sonli qarorga muvofiq, avval Axborot va ommaviy kommunikatsiyalar agentligi vakolatiqa kirgan monitoring va nazorat vazifalari to‘liq yangi inspektsiyaga o‘tkazildi. Endilikda axborotlashtirish, telekommunikatsiyalar, pochta aloqasi va raqamli xizmatlar sifatı ustidan davlat nazorati kuchaytiriladi.
Qarorda sun’iy intellekt tizimlari, ma’lumotlar bazalari, dasturiy ta’minot va raqamli resurslar faoliyati ham to‘liq nazorat doirasiga olinishi belgilangan. OAVni ro‘yxatdan o‘tkazish, ularning qonunchilikka rioya etishini monitoring qilish, shuningdek nashriyot va matbaa faoliyati ustidan tekshiruvlar ham yangi inspektsiya vakolatiga o‘tkazildi.
Bolalarni zararli axborotdan himoya qilish bo‘yicha mekanizmlar kengaytiriladi, onlayn platformalarda taqiqlangan kontent tarqalishini cheklash bo‘yicha qo‘shimcha vakolatlar berildi.
Shuningdek, “Xabar” gazetasi muassisi o‘zgarib, uning aksiyalari Prezident Administratsiyasi huzuridagi kontent tayyorlash markaziga o‘tkaziladi. Tugatilgan AOKAning barcha nazorat funktsiyalari inspektsiyaga topshirildi.
Yangi inspektsiyaga 54 ta qo‘shimcha shtat birligi ajratilib, umumiy xodimlar soni 172 taga yetkaziladi. 2027 yil 1 yanvargacha “Raqamli nazorat” platformasini ishga tushirish vazifasi qo‘yilgan bo‘lib, u orqali respublikaning barcha hududlarida raqamli xizmatlar sifatı muntazam kuzatib boriladi.
